Toshkent–Samarqand tezyurar temir yo‘li qatnov vaqtini 1,5 soatga qisqartiradi
Yangi tezyurar magistral yuk poyezdlari bilan to‘silib turgan hozirgi tarmoq yuklamasini yengillashtirib, poytaxtni yangi xalqaro aeroport orqali Samarqand markazi bilan bog‘laydi.
Toshkent va Samarqand o‘rtasida barpo etilayotgan yangi tezyurar temir yo‘l qatnov vaqtini 1,5 soatgacha qisqartirishi kutilmoqda. Loyiha 19-noyabr kuni davlat-xususiy sheriklik bo‘yicha uchinchi davra suhbatida Transport vazirligi taqdimoti orqali ochiqlandi. Vazirlik ma’lumotiga ko‘ra, yangi liniya mavjud temir yo‘l tarmoqlaridagi asosiy muammo — yuk poyezdlari sabab yuzaga kelayotgan o‘tkazish cheklovini bartaraf etishda muhim rol o‘ynaydi.
Transport vaziri o‘rinbosari Jasurbek Choriyevning ta’kidlashicha, mamlakatdagi hozirgi liniyalar bir vaqtning o‘zida yuk va yo‘lovchi tashish uchun yetarli imkoniyatga ega emas. Uning fikricha, mavjud jarayonlarni optimallashtirish bilan birga, yuqori tezlikda harakatlanuvchi alohida magistral qurilishi zarur. Choriyev tezyurar yo‘l Toshkentning yangi xalqaro aeroportidan o‘tib, Samarqand markazigacha borishi rejalashtirilganini qayd etdi.
Loyihaning texnik-iqtisodiy asoslari Koreya Eksimbanki granti yordamida ishlab chiqilgan. Shu bilan birga, yaqinda xarid qilingan olti dona Hyundai Rotem poyezdlari yil oxirida yetkazib berilib, kelasi yil boshida yo‘lovchilarga xizmat ko‘rsata boshlashi kutilmoqda.
24 oktabr kuni Janubiy Koreyaning Saman Engineering kompaniyasi Transport vazirligi, O‘zbekiston temir yo‘llari va boshqa idoralar takliflari asosida Toshkent-Samarqand tezyurar temir yo‘lining 3 ta variantini taqdim etgan. Kompaniya taklif etgan uchta variantdan birinchisi eng tezkor sanaladi: umumiy uzunlik 282 km bo‘lib, qatnov 1 soat 26 daqiqa davom etadi. Bu yo‘nalishda 74 ta ko‘prik va umumiy 8,9 kilometrlik 3 ta tonnel qurilishi ko‘zda tutilgan.
Ikkinchi variantning uzunligi 291,7 km bo‘lib, sayohat vaqti 1 soat 33 daqiqagacha yetadi. Bu loyihada 82 ta ko‘prik va 16 kilometrlik bitta tonnel mavjud.
Uchinchi variant eng uzuni — 302 kilometrdan ziyod. O‘rtacha 166,9 km/soat tezlikda qatnov 1 soat 45 daqiqa davom etadi. Yo‘nalish 105 ta ko‘prik va umumiy 9,6 kilometrlik 2 ta tonnelni o‘z ichiga oladi.
Tezyurar magistral ishga tushgach, mamlakatning ichki harakatlanish imkoniyatlari kengayishi, tranzit salohiyati oshishi va yuk tashish sig‘imidagi cheklovlar sezilarli darajada kamayishi kutilmoqda.
