Венгрия позициясини ўзгартиради: Мадяр Украина кредити бўйича вето қўймайди
Петер Мадяр Украина учун ажратиладиган 90 миллиард евролик кредитни блокламасликка ваъда берди.
Венгрияда сайловларда ғалаба қозонган «Тиса» партияси етакчиси Петер Мадяр Украина учун ажратиладиган кредит бўйича мамлакат позициясига ойдинлик киритди.
Унинг маълум қилишича, Будапешт Европа Иттифоқи томонидан тақдим этиладиган молиявий ёрдамни блокламайди.
Шу билан бирга, Мадяр ушбу кредит дастурида Венгрия маблағлари иштирок этмаслигини алоҳида таъкидлади.
Кредит бўйича аввалги келишувлар
Маълумки, Украинага 90 миллиард евро миқдорида кредит ажратиш масаласи бўйича ЕИ давлатлари раҳбарлари 2025 йил декабрида келишувга эришган. Ушбу жараёнда Виктор Орбан раҳбарлигидаги Венгрия ҳам иштирок этган. Шунингдек, Чехия ва Словакия каби давлатларга молиявий ҳисса қўшмаслик имконияти берилган эди.
Бироқ 2026 йил феврал ойида бўлиб ўтиши керак бўлган расмий овоз бериш арафасида Орбан ўз позициясини ўзгартириб, вето қўйишини маълум қилганди. Бу қарор «Дружба» нефт қувури орқали Россия нефтининг Венгрияга етказиб берилишидаги узилишлар билан боғланган эди.
Украина томони ушбу ҳолатни Россия дронлари ҳужуми билан изоҳлаган, бироқ бу маълумот мустақил манбалар томонидан тўлиқ тасдиқланмаган. Шунингдек, Киев объектга европалик инспекторларни киритишдан бош тортган
Владимир Зеленскийнинг сўнгги баёнотларига кўра, нефт қувури таъмирлаш ишлари баҳор охиригача якунланиши кутилмоқда.
