Xitoy avtosanoati Yevropada gibrid bozorini zabt etmoqda

Yevropa bozorida xitoylik avtokonsernlar ta’siri tobora ortyapti. May oyi yakunlariga ko‘ra, xitoy avtomobillari gibrid segmentida rekord darajada ulushga ega bo‘ldi. Elektromobillar sohasida esa ular so‘nggi 10 oy ichidagi eng yuqori bozor ulushini qo‘lga kiritdi. Bu holat birinchi marta qayd etilmoqda: Xitoyda ishlab chiqarilgan avtomobillarning Yevropa bo‘yicha umumiy ro‘yxatdan o‘tkazilishi 5 foizdan oshdi. Bu ko‘rsatkich ichki yonish dvigateliga ega modellarni ham o‘z ichiga oladi. Tahlilchilarga ko‘ra, Xitoy avtosanoati bu yutuqqa asosan akkumulyator texnologiyasi va dasturiy ta’minot sohalaridagi ustunlik orqali erishmoqda. Elektr va gibrid transport vositalaridagi innovatsion yechimlar yevropalik iste’molchilar uchun jozibadorlik kasb etmoqda. Yevropada ekologik toza transportga bo‘lgan talab oshib borayotgan bir paytda, Xitoy avtokonsernlari ushbu ehtiyojni raqobatbardosh narx va zamonaviy texnologiyalar orqali qondirishga harakat qilmoqda. Mutaxassislar fikricha, bu jarayon Yevropa avtomobil sanoati uchun jiddiy raqobatchilik davri boshlanganini anglatadi.