Xitoy Starlink sun’iy yo‘ldoshlarini ko‘rinmas kemalar yordamida yo‘q qilmoqchi

Associated Press ma’lumotlariga ko‘ra, ular kosmik lazerlar bilan jihozlangan ko‘rinmas kemalar yordamida yo‘ldoshlarni urib tushirish, shuningdek, ion dvigatelli maxsus sun’iy yo‘ldoshlar orqali hujum qilish usullarini ko‘rib chiqmoqda. Xitoyda Starlink tarmog‘i mamlakat xavfsizligi uchun tahdid sifatida baholanmoqda. Bunga Maskning kompaniyasi AQSH razvedka va harbiy idoralari bilan yaqin hamkorlikda ekanligi asos qilib ko‘rsatiladi. Mutaxassislar fikricha, ushbu xavotir ayniqsa Rossiya–Ukraina urushi boshlangach kuchaygan, chunki Ukraina urush davomida Starlink aloqa xizmatidan faol foydalanmoqda. Starlink — SpaceX kompaniyasining global internet tarmog‘i bo‘lib, minglab kichik sun’iy yo‘ldoshlar orqali yer sharidagi uzoq hududlarga internet xizmatini taqdim etadi. Xitoy rasmiylari va olimlari bu tizimning harbiy qo‘llanilishi imkoniyatidan xavotir bildirmoqda. Masalaning dolzarbligi Xitoyning kelgusi yillarda kosmik mudofaa strategiyasini takomillashtirish va sun’iy yo‘ldoshlarga qarshi texnologiyalarni rivojlantirish rejalari bilan ham bog‘liq.