2026 yil dunyodagi eng qimmat xususiy kompaniyalar prognozi e’lon qilindi
Kosmik tadqiqotlardan tortib sun’iy intellektgacha — 2026 yilda dunyoning eng qimmat xususiy kompaniyalarining bahosi bir necha yuz milliard dollarga yetadi.
Amerikaning moliyaviy nashri Barron’s e’lon qilgan reytingga ko‘ra, dunyodagi eng qimmat o‘nta xususiy kompaniyaning umumiy bozor qiymati bir necha yuz milliard dollarni tashkil etadi. Bu xususiy kapitalning texnologiyaga bo‘lgan ishonchi qay darajada o‘sganini ko‘rsatadi.
Ro‘yxatda birinchi o‘rinda SpaceX turibdi. Ilon Mask rahbarligidagi kompaniyaning bahosi taxminan 800 milliard dollarga yetgan. Starlink sun’iy yo‘ldosh internet tarmog‘i kengayishi va kosmik texnologiyalarga investitsiyalar SpaceX’ni raqobatchilaridan ancha oldinga olib chiqdi. Kompaniya 2026 yilda IPO o‘tkazishi mumkinligi haqidagi taxminlar ham shu bilan bog‘liq.
Ikkinchi yirik kompaniya — OpenAI. ChatGPT yaratuvchisi hisoblangan bu kompaniyaning bahosi ikkilamchi bozordagi yirik bitimlardan keyin 500 milliard dollar atrofida shakllanmoqda. Bu holat xususiy bozorning generativ sun’iy intellektga bo‘lgan ishonchini mustahkamladi.
Xitoyning texnologik giganti ByteDance ham reytingning yuqori qismida. TikTok orqali global auditoriyaga ega kompaniya taxminan 480 milliard dollarga baholanmoqda va xususiy korporativ gigantlar geografiyasining kengligini namoyon etyapti.
Sun’iy intellekt startaplari — Anthropic va xAI tez sur’atda o‘sib, investorlar o‘rtasidagi raqobatni kuchaytirmoqda. Bu kompaniyalar, shuningdek bahosi yaqinda 134 milliard dollargacha oshgan Databricks bilan birga, yangi avlod texnologiyalarini tijoratlashtira oladigan bizneslarga venchur va xususiy investitsiya fondlarining qiziqishi juda yuqori ekanini aks ettiradi.
Bundan tashqari, allaqachon shakllangan fintex-kompaniyalar — masalan, Stripe va Revolut global raqamli to‘lovlar va bank innovatsiyalarining rivoji hisobidan yuqori baholarni saqlab qolmoqda. Moliyaviy infratuzilma provayderi Binance esa kriptovalyuta ekotizimidagi eng yirik xususiy tuzilmalardan biri bo‘lib qolmoqda.
2025 yilda xususiy investitsiyalarning qariyb yarmi sun’iy intellekt startaplariga to‘g‘ri kelgani bu sektorning kelgusi yillarda ham asosiy drayver bo‘lib qolishini ko‘rsatadi.
Avvalroq Vaqt.uz dunyo boyliklarining 75 foizini o‘zida saqlayotgan 10 foiz milliarderlar haqida ma’lumot bergan edi.
