Alisher Sultonov energetik xavfsizlik bo‘yicha vakil lavozimidan ozod etildi

O‘zbekiston Respublikasi Prezidentining farmoniga muvofiq Alisher Saidabbasovich Sultonov O‘zbekiston Respublikasi Prezidentining energetik xavfsizlik bo‘yicha vakili lavozimidan ozod etildi. Bu haqda davlat rahbari matbuot kotibi Sherzod Asadov rasman ma’lum qildi. 

Farmon mazmunida ushbu qarorning sabablari, shuningdek, yangi tayinlov yoki lavozimlar almashinuvi haqida qo‘shimcha ma’lumotlar keltirilmagan.

Alisher Sultonov so‘nggi yillarda mamlakat energetika siyosati va strategik xavfsizlik masalalarida muhim rol o‘ynagan amaldorlardan biri hisoblanadi. U 2022 yildan buyon Prezidentning energetik xavfsizlik bo‘yicha maslahatchisi, keyinchalik vakili sifatida faoliyat yuritib kelgan. Bu lavozimda u energetika sohasida barqarorlikni ta’minlash, yirik infratuzilma loyihalarini muvofiqlashtirish va xalqaro hamkorlik masalalari bilan shug‘ullangan.

Sultonovning mehnat faoliyati asosan neft-gaz va energetika sohalari bilan bog‘liq. U 2015–2018 yillarda «O‘zbekneftgaz» milliy xolding kompaniyasi boshqaruvi raisi bo‘lib ishlagan. Shuningdek, u 2017–2022 yillarda O‘zbekiston Respublikasi Bosh vazirining o‘rinbosari lavozimida faoliyat yuritgan.

2019 yil 16-fevraldan 2022 yil 7-iyungacha Alisher Sultonov bir vaqtning o‘zida Bosh vazir o‘rinbosari va Energetika vaziri lavozimlarini egallagan. Bu davrda mamlakat energetika tizimini isloh qilish, elektr va gaz ta’minotini diversifikatsiya qilish hamda xorijiy investitsiyalarni jalb etish bo‘yicha qator tashabbuslar amalga oshirilgan.

U, shuningdek, sport sohasida ham rahbarlik lavozimlarida bo‘lgan. Jumladan, O‘zbekiston Milliy Olimpiya qo‘mitasi prezidenti va vitse-prezidenti, O‘zbekiston shaxmat federatsiyasi raisi sifatida faoliyat yuritgan.

Ayni paytda, Alisher Sultonovning keyingi faoliyati haqida rasmiy ma’lumot berilmagan.