Brent навли нефт нархи майдан бери илк бор 60 доллардан пастлади
Brent нефти нархи баррелига 60 доллардан пастлаб, май ойидан бери энг қуйи даражага тушди. Бозор Украинада тинчлик эҳтимолини ҳисобга олмоқда.
16 декабр куни жаҳон нефт бозорида кескин пасайиш қайд этилди. Эрталабки савдоларда Brent маркали нефт фючерслари 1,8 фоизга арзонлаб, баррели 59,7 долларгача тушди. Бу кўрсаткич май ойидан бери қайд этилган энг паст нарх ҳисобланади.
Financial Times маълумотларига кўра, АҚШнинг WTI нефти 15 декабр якунлари бўйича 56,8 доллар даражасида ёпилди. Бу 2021 йил февралдан бери энг паст кўрсаткич бўлди. Нашр қилинган пайтда январь ойи учун WTI шартномалари 55,7 доллар атрофида савдо қилиб, қарийб 2 фоизга пасайган.
Нархлар тушишига асосий сабаб сифатида Украинадаги уруш бўйича тинчлик келишувига бўлган кутилмалар тилга олинмоқда. Bloomberg нашрининг таъкидлашича, АҚШ президенти Доналд Трампнинг келишув «ҳар қачонгидан ҳам яқин» экани ҳақидаги баёноти нефт нархларидаги геосиёсий премияни камайтирмоқда.
Таҳлилчиларнинг фикрича, агар Украина бўйича тинчлик келишуви имзоланса, бу нефт бозорига қисқа муддатда жиддий таъсир кўрсатади. Morgan Stanley стратеги Мартин Ратснинг таъкидлашича, санкциялар туфайли Россия нефти узайтирилган логистика занжирлари орқали етказилмоқда. Мазкур чекловлар бартараф этилса, бу «ўнлаб, эҳтимол юзлаб миллион баррел нефт»нинг бозорга қайтишига тенг бўлади.
Energy Aspects консалтинг компанияси эса тез орада келишувга эришилишини кутмаётганини билдириб, бироқ ушбу жараён ҳозирда бозор учун энг катта геосиёсий ноаниқлик манбаи эканини қайд этди. Айниқса, йил охирида савдолар ликвидлиги пасайган пайтда бу омил янада сезиларли бўлади.
Қайд этиш жоизки, Brent нефти кетма-кет беш ой давомида арзонламоқда. Бу сўнгги 11 йил ичидаги энг узоқ пасайиш даври ҳисобланади. 2025 йил бошидан буён нефт нархи қарийб 20 долларга тушди. Халқаро энергетика агентлиги 2026 йилда бозорда кунлик 3,7 млн баррел миқдорида профицит юзага келишини прогноз қилмоқда.
