Dubayda dunyodagi eng baland mehmonxona ochildi

Dunyodagi eng baland mehmonxona — Ciel Dubai Marina o‘zining dastlabki mehmonlarini kutib oldi. 377 metr balandlikdagi bu inshoot Dubaydagi 356 metr balandlikdagi Gevora mehmonxonasidan o‘zib ketdi. Bu haqda «The National» nashri xabar berdi.

82 qavatdan iborat va 1004 ta xona hamda lyukslarni o‘z ichiga olgan Ciel Dubai Marina yana bir rekordni — dunyodagi eng baland cheksiz basseynni o‘rnatdi. Tattu Sky Pool 76-qavatda joylashgan bo‘lib, shahar ustida 310 metr balandlikda mavjlanadi.

Bu basseyn 10-oktabr kuni ochilgan va 74-qavatda joylashgan Manchesterda tashkil topgan zamonaviy Osiyo restoranlari tarmog‘ining birinchi xalqaro filiali — Tattu Dubai’ning bir qismidir. Restoran, shuningdek, 81-qavatdagi Tattu Sky Lounge & Terrase’ni ham boshqaradi, u tomda shaharning 360 daraja ko‘rinishini taqdim etadi.

Ciel Dubai Marina IHG Hotels & Resorts kompaniyasiga tegishli Vignette Collection brendi ostida The First Group Hospitality tomonidan boshqariladi.

Tattu Dubai’dan tashqari, ovqatlanish imkoniyatlari orasida O‘rta yer dengizi taomlarini taqdim etuvchi West 13; Osiyo taomlari uchun East 14; va mahalliy konsepsiya Risen Cafe & Artisanal Bakery mavjud bo‘lib, u kafe uslubidagi taomlarni kun bo‘yi taqdim etadi.

SPA va 24 soatlik sport zali 61-qavatda joylashgan, barcha mehmonlar esa Palm Jumeyra’dagi Soluna Beach Club’ga kirish va bepul transfer xizmatidan foydalanish imkoniyatiga ega bo‘ladilar.

Ciel Dubai Marina, shuningdek, Dubai Marina Mall va shaharning tramvay hamda metro xizmatlari bilan qulay bog‘lanishni ta’minlaydi. Uning joylashuvi mehmonlarga yaqin atrofdagi JBR plyajiga va dunyodagi eng baland kuzatuv g‘ildiragi - Ain Dubai joylashgan Bluewaters hududiga oson yetib borishga imkon beradi.

Dastlab o‘tgan yili ochilishi rejalashtirilgan 2 milliard dirham (544 million dollar) qiymatidagi Siel Dubai Marina allaqachon dunyodagi eng baland 10 ta mehmonxonaning sakkiztasi joylashgan osmon chizig‘iga qo‘shildi. Bular qatoriga Rose Rayhaan by Rotana (333 metr), Burj Al Arab (321 metr), Jumeirah Emirates Towers (309 metr), Address Beach Resort (301 metr) va Tower Plaza (294 metr) kabi mehmonxonalar kiradi.

Siel Dubai Marina boshqaruvchi direktori Genrix Morio shunday dedi: «Bu g‘ayrioddiy mehmonxona innovatsiya, hashamat va ijodkorlikni qayta ta’riflaydi, unutilmas va yuksak tajribani taqdim etadi. Biz mehmonlarni samimiy iliqlik va e’tibor bilan kutib olishdan mamnunmiz, bu esa chinakam mehmondo‘stlik muhitini yaratadi».