Jahon neft zaxiralari rekord sur’atlarda qisqarmoqda
«S&P Global» va «Goldman Sachs» tahlilchilari bahosiga ko‘ra, aprel oyida jahon neft zaxiralari rekord darajada – 200 mln barrelga kamaygan. Bu esa AQSHning Eronga qarshi urushi ortidan xomashyo narxlari oshishi va talab pasayishiga qaramay sodir bo‘lgan.
© Foto: Al ArabyAQSH va Isroilning Eronga qarshi urushi sabab, jahon neft zaxiralari aprel oyi yakunlariga ko‘ra rekord darajada – 200 mln barrelga qisqardi. Bu haqda «S&P Global» va «Goldman Sachs» tahlilchilari ma’lumotlariga tayanib, «Financial Times» xabar berdi.
«S&P» hisob-kitoblariga ko‘ra, o‘tgan oyda neft zaxiralari sutkasiga 6,6 mln barrelga kamaygan. Bu talab pasayganiga qaramay sodir bo‘lgan. Shu bilan birga, neftga bo‘lgan global talab sutkasiga 5 mln barrelga tushib ketgan – bu kuzatuvlar tarixidagi ikkinchi eng katta pasayish hisoblanadi. Bundan kattaroq tushish faqat koronavirus pandemiyasi davrida kuzatilgan.
«Goldman Sachs» tahlilchilari ham bu bahoga qo‘shilmoqda. Ularga ko‘ra, jahon neft zaxiralari so‘nggi sakkiz yildagi eng past darajaga yaqinlashmoqda.
«Argus» ma’lumotlariga ko‘ra, Shimoliy Yevropada aviatsiya yoqilg‘isi zaxiralari aprel oyida so‘nggi olti yildagi eng past ko‘rsatkichga tushgan. Hozircha asosiy ta’sirni asosan Osiyo davlatlari his qilmoqda. Biroq AQSHsda ham yozgi ta’tillar mavsumida benzin zaxiralari tarixiy minimum darajaga yetishi mumkinligi qayd etilmoqda.
Ekspert: neft narxlarining asosiy o‘sishi hali oldinda
«Financial Times» xabar berishicha, Yaqin Sharqdagi urush va Ho‘rmuz bo‘g‘ozi blokadasi sabab jahon neft bozoriga allaqachon 1 mlrd barrel neft yetkazib berilmay qolgan. Treyderlar dunyo neft zaxiralari tanqidiy chegaraga yaqinlashayotganini aytmoqda. Ularning fikricha, bu holat bir necha hafta ichida yuzaga kelishi mumkin.
«S&P Global»ning neft bozori tadqiqotlari rahbari Jim Burxardning ta’kidlashicha, bu juda katta hajm bo‘lib, odatiy diapazondan ancha yuqori.
«Bozor hozircha zaxiralar qisqarishining rekord sur’atlariga to‘liq reaksiya bildirmadi. Shuning uchun neft narxlarining o‘sishi hali oldinda», – dedi u.
«Financial Times» izohiga ko‘ra, jahon neft zaxiralari umumiy hisobda taxminan 4 mlrd barrelni tashkil etadi. Biroq bu hajmning katta qismi neftni qayta ishlash zavodlari va quvur tizimlarining kundalik faoliyatini ta’minlash uchun doimiy ravishda ishlatib turiladi.
