Kannavaro: «Umid qilaman, biz oxirigacha kurashamiz»
O‘zbekiston milliy terma jamoasi bosh murabbiyi Fabio Kannavaro 2026-yilgi jahon chempionati guruh bosqichi qur’asidan so‘ng o‘z fikrlarini bildirdi.
O‘zbekiston milliy jamoasi bosh murabbiyi Fabio Kannavaro 2026 yilgi jahon chempionati guruh bosqichi qur’asiga munosabat bildirdi. Uning fikricha, mundialda raqib tanlashning o‘zi ma’nosiz, chunki bu musobaqada ishtirok etayotgan har bir terma jamoa yuqori saviyada tayyorgarlikka ega.
«Bu — jahon chempionati, bu yerda qur’ada kim tushishiga qarab shikoyat qilish mumkin emas. Portugaliya ham, Kolumbiya ham juda jiddiy raqiblar. Futbolchilarimiz uchun bu bellashuvlar katta hayajon va qimmatli tajriba bo‘ladi», — deydi murabbiy.
O‘zbekiston debyut qiladigan ushbu chempionatda Portugaliya va Kolumbiya bilan bir guruhda harakat qiladi. Murabbiyning ta’kidlashicha, asosiy maqsad faqat ishtirok etish emas, balki har bir o‘yinda bor kuch bilan maydonga tushish va guruh bosqichi oxirigacha kurashishdan iborat.
U jamoaning mundialda ishtirok etayotganidan mamnunligini bildirib, tayyorgarlik jarayoni turnirdagi natijalarga katta ta’sir qilishini ta’kidladi.
«Bu Jahon chempionati va unda har qanday jamoa bilan ro‘baro‘ kelish mumkin. Biz Portugaliya va Kolumbiyaga qarshi o‘ynaymiz, futbolchilarimiz uchun ham juda hayajonli bo‘ladi. Biz mundialdamiz, bu — qur’a va unda hamma narsa bo‘lishi mumkin. Hozir shu yerda ekanligimizdan xursandmiz. Umid qilamanki, biz oxirigacha kurashamiz», deydi Kannavaro.
Alohida qayd etish joizki, O‘zbekiston terma jamoasining guruh bosqichi uchrashuvlari Meksika va AQSH stadionlarida o‘tkazilishi kutilmoqda. Dastlabki bellashuv 17-iyunda Mexikodagi Afsonaviy «Atsteka» arenasida Kolumbiyaga qarshi bo‘ladi. Shundan keyin, 23-iyunda jamoa Gvadalaxarada Krishtianu Ronaldu boshchilik qiladigan Portugaliyaga qarshi maydonga tushadi. Guruhdagi so‘nggi uchrashuv esa 27-iyunda Kondo, Yamayka yoki Yangi Kaledoniya o‘rtasidagi pley-off g‘olibiga qarshi AQSHning Mayamidagi «Hard Rock» yoki Atlantadagi stadionda o‘tkazilishi mumkin.
2026 yilgi jahon chempionati 11-iyundan 19-iyulgacha AQSH, Kanada va Meksika hududida bo‘lib o‘tadi. Musobaqa tarixda ilk bor 48 ta terma jamoani birlashtiradi. Kanada va Meksika 13 tadan o‘yinga mezbonlik qiladi; Kanadada o‘yinlar Toronto va Vankuverda, Meksikada esa Mexiko, Gvadalaxara va Monterreyda o‘tkaziladi. Qolgan barcha uchrashuvlar AQSHning yirik stadionlarida tashkil etilishi rejalashtirilgan.
