«Nvidia» H200 SI-chiplari: Tramp ruxsat berdi, rasmiy Pekin hali jim — Reuters
Xitoydagi yuqori talab tufayli «Nvidia» H200 SI-chiplari ishlab chiqarilishini kengaytirishi mumkin. Bu chip «Nvidia»ning xaridorlar xarid qilishi mumkin bo‘lgan chiplari qatorida ikkinchi o‘rinda turadi.
«Nvidia» chip ishlab chiqaruvchi kompaniyasi Xitoydagi mijozlariga H200 SI-chiplarini ishlab chiqarish hajmini oshirish imkoniyatini ko‘rib chiqayotganini ma’lum qilgan. Bu haqda Reuters o‘z manbalariga tayangan holda xabar berdi.
Bu qarorga kompaniya buyurtmalar hajmi mavjud imkoniyatlaridan ancha yuqori ekanligi sabab bo‘lgan. Ilgari AQSH prezidenti Donald Tramp Vashington Xitoyga ushbu chiplarni eksport qilishga ruxsat berishini aytgandi, ammo endilikda Pekinning pozitsiyasi yangi to‘siqqa aylanishi mumkin.
Voqea tafsilotlari
Reuters agentligi suhbatdoshlaridan birining ta’kidlashicha, Xitoy kompaniyalari tomonidan yuqori quvvatli SI-chiplarga bo‘lgan talab shunchalik kattaki, «Nvidia» ishlab chiqarishni kengaytirish haqida jiddiy o‘ylayapti. «Nvidia» bu masala bo‘yicha Reuters so‘roviga izoh bermagan.
H200 chiplari «Nvidia»ning avvalgi avlod protsessorlariga tegishli bo‘lib, ular 2024 yilda ommaviy ravishda joriy etilgan. Ushbu chiplar Tayvanning TSMC zavodlarida juda cheklangan hajmda ishlab chiqariladi. Chunki ishlab chiqaruvchi o‘z e’tiborini ilg‘or «Blackwell» hamda kelajakdagi «Rubin» chiplari ishlab chiqarishga qaratayotgan edi.
Reuters manbalariga ko‘ra, H200 chiplarining mavjudligi Xitoy mijozlari uchun asosiy muammoga aylangan. Ular bu borada izoh olish uchun «Nvidia»ga murojaat qilishgan. «Nvidia» o‘tkazgan brifinglarda kompaniya mijozlarga yetkazib berish hajmi haqida ma’lumot bergan, dedi manbaladan biri, aniq raqamlarni keltirmagan holda.
Voqea konteksti
Reuters manbalari hafta davomida xabar berishicha, Xitoyning yirik kompaniyalari, jumladan «Alibaba» va «ByteDance», «Nvidia» bilan H200 chiplarini sotib olish masalasida aloqada bo‘lgan va katta hajmda buyurtmalar berishga qiziqish bildirgan. Seshanba kuni AQSH prezidenti Donald Tramp hukumat «Nvidia» kompaniyasiga H200 protsessorlarini — kompaniyaning ikkinchi eng kuchli SI-chiplarini Xitoyga eksport qilishga ruxsat berishini ma’lum qildi. Biroq bunday yetkazib berishlar uchun 25 foizlik boj undiriladi. Shu bilan birga, yarimo‘tkazgich ishlab chiqaruvchi kompaniyalarga 18 oy oldin yoki undan ham avval ishlab chiqarilgan texnologiyalarni Xitoyga yetkazishga ham ruxsat beriladi.
Biroq Pekinga yetkazib berish masalasida aniqlik hali yo‘q — Xitoy rasmiylari hozircha H200 importiga «yashil chiroq» yoqishmagan. Reuters ma’lumotlariga ko‘ra, chorshanba kuni Xitoyda bu masala yuzasidan shoshilinch yig‘ilishlar o‘tkazilgan va H200 chiplarini import qilishga ruxsat berish yoki berishmaslik bo‘yicha qaror keyinroq qabul qilinadi.
Xitoy kompaniyalarining H200 chiplariga yuqori qiziqishi shundaki, bu hozirda ularda mavjud bo‘lgan eng yuqori quvvatli chip hisoblanadi. Reutersʼning ta’kidlashicha, u H20 chipiga nisbatan taxminan olti baravar yuqori samaradorlikka ega. H20 — «Nvidia» kompaniyasining Xitoy bozori uchun maxsus tayyorlagan eksport uchun qisqartirilgan chipi bo‘lib, 2023 yil oxirida chiqarilgan.
«H200 hisoblash operatsiyalari bo‘yicha mahalliy ilg‘or chiplarga qaraganda ikki yoki uch baravar yuqori samaradorlikka ega, — dedi Reuters’ga White Oak Capital Partners investitsiya direktori Nori Chiu. — Men allaqachon ko‘plab bulut texnologiyasi provayderlari va korporativ mijozlar tomonidan juda katta hajmda buyurtmalar joylashtirilayotganini va hukumatdan muayyan shartlar evaziga cheklovlarni yumshatishni talab qilayotganini ko‘ryapman».
Reuters manbalariga ko‘ra, Xitoyda o‘tkazilgan shoshilinch yig‘ilishlarda har bir H200 sotib olish amaliyotida mahalliy chiplardan ma’lum miqdorda xarid qilish majburiyatini joriy etish taklifi ham muhokama qilingan.
