O‘zbekistonda ko‘mir, neft va gaz qazib olish keskin kamaydi
O‘zbekistonda 2026 yilning birinchi choragida neft, gaz va ko‘mir qazib olish hajmi pasaydi, benzin, elektr energiyasi, dizel yoqilg‘isi va portlandsement ishlab chiqarishida esa o‘sish kuzatildi.
© RIA Novosti2026 yil yanvar–mart oylarida O‘zbekistonda asosiy energetika resurslari qazib olish hajmi sezilarli qisqardi. Milliy statistika qo‘mitasi ma’lumotlariga ko‘ra, tabiiy gaz qazib chiqarish 9,6 mlrd kub metrni tashkil etib, o‘tgan yilning shu davriga nisbatan 15 foizga kamaygan.
Shu davrda 157,3 ming tonna neft qazib olingan bo‘lib, bu 2025 yil birinchi choragiga nisbatan 2,2 foizga pastdir. Gaz kondensati ishlab chiqarish hajmi esa 18,3 foizga qisqarib, 242,3 ming tonna bo‘ldi.
Ikki yillik taqqoslash
2024 yil bilan taqqoslaganda pasayish yanada yuqori bo‘lgan. Xususan, ikki yil ichida gaz qazib olish 17,2 foizga, neft 12,2 foizga, gaz kondensati esa 26 foizga kamaygan.
Avtomobil benzini ishlab chiqarish 2,9 foizga oshib, 313,2 ming tonnaga yetdi. Biroq bu ko‘rsatkich 2024 yil darajasidan hali ham 13,1 foizga past bo‘lib qolmoqda.
Ko‘mir qazib olish 1,1 mln tonnagacha qisqardi — bu o‘tgan yilga (1,2 mln tonna) nisbatan 8,3 foizga kam. Shu bilan birga, joriy ko‘rsatkich xuddi shu davrda 1 mln tonna qazib olingan 2024-yil darajasidan ham yuqori.
Ijobiy dinamika
Portlandsement va dizel yoqilg‘isi ishlab chiqarishda ijobiy dinamika saqlanib qolmoqda. Portlandsement ishlab chiqarish yil davomida 13,9 foizga oshib, 3,6 mln tonnadan 4,1 mln tonnaga yetdi.
Dizel yoqilg‘isi ishlab chiqarish 54,3 foizga — 2025-yildagi 182 ming tonnadan 280,9 ming tonnagacha keskin o‘sdi. Taqqoslash uchun: 2024-yilda dizel ishlab chiqarish hajmi 211,8 ming tonnani tashkil etgan.
Elektr energiyasi ishlab chiqarish esa 4,7 foizga oshib, 22,93 mlrd kW/hga yetdi. Asosiy o‘sish kichik tadbirkorlik subyektlari hisobiga ta’minlangan.
