«Ўзбектелеком»нинг соф фойдаси 16 бараварга ошди
Компания 2026 йил I чорагида 412 млрд сўмдан ортиқ соф фойда кўрган.
«Ўзбектелеком» АК 2026 йилнинг биринчи чораги якунларига кўра 412,25 млрд сўм соф фойда қайд этди. Бу кўрсаткич ўтган йилнинг шу даврига нисбатан қарийб 16 бараварга ошган. 2025 йил I чорагида компания соф фойдаси 25,73 млрд сўмни ташкил этган эди.
Компания ҳисоботига кўра, хизмат ва маҳсулотлар реализациясидан тушган соф тушум 2,84 трлн сўмга етган. Бу ўтган йилги 2,52 трлн сўмлик кўрсаткичдан 12,5 фоизга юқори. Яъни даромад ҳажми бир йилда 315,65 млрд сўмга ошган.
Шу билан бирга, сотилган маҳсулот ва хизматлар таннархи деярли ўзгармаган ҳолда 1,68 трлн сўм атрофида сақланиб қолган. Бу эса ялпи фойданинг 852,64 млрд сўмдан 1,16 трлн сўмгача ўсишига хизмат қилган. Ушбу кўрсаткич 36 фоизлик ўсишни англатади.
Асосий фаолиятдан олинган фойда ҳам сезиларли даражада ошган. 2025 йил I чоракда 402,96 млрд сўм бўлган ушбу кўрсаткич 2026 йилда 631,93 млрд сўмга етган. Бу 56,8 фоизлик ўсиш демакдир.
Молиявий омиллар таъсири
Соф фойданинг кескин ўсишида молиявий фаолиятдан олинган даромадлар ҳам муҳим рол ўйнаган. Жумладан, молиявий даромадлар 261,01 млрд сўмни ташкил этган бўлиб, бу ўтган йилги 34,8 млрд сўмга нисбатан бир неча баравар кўпдир.
Бу ўсишда валюта курслари фарқидан олинган 244,23 млрд сўм даромад асосий омил бўлган. Бироқ молиявий харажатлар ҳам юқори даражада сақланиб, 422,94 млрд сўмни ташкил этган.
Ҳисобот даврида компаниянинг солиққача фойдаси 470 млрд сўмга етган. 57,75 млрд сўм даромад солиғи тўланганидан сўнг, якуний соф фойда 412,25 млрд сўмни ташкил этган.
Шунингдек, «Ўзбектелеком» АК хизмат кўрсатиш корхоналари ичида энг кўп солиқ тўлаган компания бўлиб, 2026 йилнинг январь-март ойларида жами 353,4 млрд сўм солиқ тўлаган.
