Qirg‘iziston Milliy banki aktivlari salkam 9,5 milliard dollarga yetdi
Aktivlarning asosiy o‘sishi monetar oltin hisobiga ta’minlangan. Milliy bank balansidagi oltinning qiymati oxirgi bir yilda 2,21 milliard dollarga oshgan.
© Foto: 24.kg2026-yilning ikkinchi choragi yakunlariga ko‘ra, Qirg‘iziston Milliy bankining aktivlari 830,4 milliard somni (9,5 milliard dollar) tashkil etdi. Bir yil avval bu ko‘rsatkich 713,1 milliard som (8,15 milliard dollar) edi. Shunday qilib, bir yil ichida regulyator aktivlari 117 milliard somdan ko‘proqqa (1,34 milliard dollar), ya’ni qariyb 16 foizga oshgan. Bu ma’lumotlar Qirg‘iziston Milliy bankining joriy yil ikkinchi chorak bo‘yicha hisobotida keltirilgan.
Aktivlarning asosiy o‘sishi monetar oltin hisobiga ta’minlangan. Milliy bank balansidagi oltinning qiymati 2025-yil iyun oyi oxiridagi 358 milliard somdan (4,09 milliard dollar) 2026-yil 30-iyun holatiga 551,2 milliard somgacha (6,3 milliard dollar) oshgan. Bu 193 milliard somdan ortiq (2,21 milliard dollar) o‘sish degani.
Shu bilan birga, kassadagi mablag‘lar, banklar va boshqa moliyaviy tashkilotlardagi pul mablag‘lari aksincha, deyarli ikki baravar kamaygan — 163,4 milliard somdan (1,87 milliard dollar) 85,4 milliard somgacha (977 million dollar) tushgan.
Milliy bank tomonidan chiqarilgan qarz qimmatli qog‘ozlari hajmi ham sezilarli oshgan. Ularning qiymati 11 milliard somdan (125,8 million dollar) 53,2 milliard somgacha (608,3 million dollar) ko‘paygan. Muomaladagi banknot va tangalar hajmi ham oshgan: 275,3 milliard somdan (3,15 milliard dollar) 317 milliard somgacha (3,62 milliard dollar) yetgan. Tijorat banklari va boshqa moliyaviy tashkilotlarning Milliy bankdagi hisobvaraqlaridagi mablag‘lari 168,9 milliard somgacha (1,93 milliard dollar) ko‘tarilgan. Shu bilan birga, hukumat (Vazirlar Mahkamasi) mablag‘lari 98,1 milliard somdan (1,12 milliard dollar) 79,8 milliard somgacha (912,5 million dollar) kamaygan.
Hisobot davri yakunlariga ko‘ra, Qirg‘iziston Milliy bankining foydasi 41,5 milliard somni (474,6 million dollar) tashkil qilgan. Bir yil avval esa bu ko‘rsatkich 19,5 milliard som (223 million dollar) edi. Ya’ni bank foydasi ikki baravardan ko‘proqqa oshgan. Milliy bankning jami kapitali 157,9 milliard somdan (1,81 milliard dollar) 186,3 milliard somgacha (2,13 milliard dollar) ko‘paygan. Majburiyatlari esa 555,3 milliard somdan (6,35 milliard dollar) 644 milliard somgacha (7,36 milliard dollar) oshgan.
Eslatib o‘tamiz, Qirg‘iziston 2025-yilda Yevroosiyo iqtisodiy ittifoqi mamlakatlari orasida valuta bozori eng tez o‘sgan mamlakat bo‘lgandi.
