Qozog‘iston va AQSH KQK orqali neft tranzitini muhokama qilmoqda
Mazkur konsorsium Qozog‘iston g‘arbidan Novorossiysk porti yaqinidagi Qora dengizdagi terminallarga neft yetkazib berish uchun qurilgan yirik xalqaro neft quvurlari tizimi hisoblanadi.
Qozog‘iston energetika vaziri Yerlan Akkenjenov AQSHning ichki ishlar vaziri, Energetika ustunligi kengashi raisi Dag Bergum bilan qo‘shma loyihalarni amalga oshirish, shuningdek, asosiy eksport yo‘nalishi hisoblangan Kaspiy quvur konsorsiumi (KQK) ning barqaror faoliyatini ta’minlash masalalarini muhokama qildi. Bu haqda Qozog‘iston Energetika vazirligi matbuot xizmati xabar berdi.
«Tomonlar yirik qo‘shma loyihalarni amalga oshirish jarayoni va konlarni yanada o‘zlashtirish rejalarini muhokama qildi. Neftni tashish, xususan, asosiy eksport yo‘nalishi sifatida Kaspiy quvur konsorsiumining (KQK) barqaror va ishonchli faoliyatini ta’minlash masalalariga alohida e’tibor qaratildi», - deyiladi BAA da bo‘lib o‘tgan ADIPEC-2025 xalqaro energetika forumi doirasidagi uchrashuvdan so‘ng matbuot xizmati xabarida.
Akkenjenov Amerika kompaniyalari Qozog‘istondagi Tengiz, Qorachag‘anoq va Qashag‘on kabi yirik loyihalarda asosiy hamkorlar ekanligini ta’kidladi.
«Qozog‘istonda amalga oshirilayotgan loyihalar amerikalik hamkorlarimizning global portfellaridagi asosiy aktivlardir. Ularning ko‘lami jahon energetika barqarorligini ta’minlashda Qozog‘istonning strategik ahamiyatini ko‘rsatadi hamda muvaffaqiyatli va o‘zaro manfaatli hamkorlikni aks ettiradi», - deya Akkenjenovning so‘zlarini keltiradi matbuot xizmati.
KQK - Qozog‘iston g‘arbidan (asosan Tengiz, Qorachag‘anoq va Qashag‘on konlaridan) Novorossiysk porti yaqinidagi Qora dengizdagi terminallarga neft yetkazib berish uchun qurilgan yirik xalqaro neft quvurlari tizimi hisoblanadi.
