Tailand Kambodja hududiga havo zarbalari yo‘lladi
Tailand Kambodja chegarasidagi tailandlik harbiy halok bo‘lgan hujumdan so‘ng Tailand Kambodja hududidagi bir necha harbiy obyektlarga havodan zarba berdi.
Tailand armiyasi Kambodja hududidagi bir necha «harbiy ob’ektlar»ga havo zarbalari berdi. Armiya rasmiysi Vintay Suvarining ma’lum qilishicha, zarbalar asosan infratuzilma, qurol-aslaha omborlari, boshqaruv punktlari va logistika yo‘nalishlarini nishonga olgan. Bu harakat Kambodja harbiylari tomonidan Tailandning Ubonratchatxani provinsiyasida tay qo‘shinlariga o‘t ochilgani ortidan amalga oshirilgan. Hujum natijasida bir harbiy halok bo‘lib, yana to‘rt kishi yaralangani bildirilgan.
Hukumat chegaraga yaqin hududlarda xavf ortganini e’tirof etmoqda. Rasmiy ma’lumotlarga ko‘ra, Tailand to‘rtta tumanidan 385 mingdan ortiq aholi evakuatsiya qilinmoqda, ularning 35 mingdan ziyodi allaqachon vaqtinchalik maskanlarga joylashtirilgan. Ayni paytda vaziyatning yanada keskinlashishi mumkinligi haqida ogohlantirilmoqda.
Kambodja esa Tailandni Preax-Vixear va Oddarmeantey provinsiyalarida uning qo‘shinlari ustidan hujumlar uyushtirganlikda ayblamoqda. Kambodja mudofaa vazirligi vakili tay qo‘shinlari tanklardan foydalanib ibodatxonalarni ham o‘qqa tutganini, biroq Kambodja javob o‘ti ochmaganini ta’kidladi. Bu ayblovlar taraflar o‘rtasidagi ishonchni yanada susaytirdi.
Ikki davlat o‘rtasidagi chegara mojarosi bir asrdan buyon to‘xtamasdan davom etayotgani ma’lum. Nizoning markazida Preaxvixea ibodatxonasi hamda «Yashil uchburchak» deb ataluvchi hudud mavjud bo‘lib, koloniyaviy davrdan qolgan noaniq chegara chiziqlari mojaroni chuqurlashtirib kelmoqda. Yil davomida bir necha marta keskinlashgan vaziyat bu gal yana yangi bosqichga o‘tdi.
Yoz oylarida — chegaraning shimoliy qismida yuz bergan to‘qnashuvlar Pattayya yaqinigacha yetgan, besh kun davom etgan janglarda kamida 43 kishi halok bo‘lgan, 300 mingga yaqin aholi qochqinga aylangan edi. Otashkesimga erishish uchun AQSH prezidenti Donald Tramp ham aralashgan, oktabr oyiga kelib taraflar AQSH vositachiligida tinchlik kelishuvini imzolagandi. Biroq Tailand yaqinda chegara yaqinida mina portlashi sabab ikki harbiy yaralanganini bildirgach, ushbu kelishuvni amalga oshirishni to‘xtatib qo‘ydi.
