Tramp qo‘llaridagi ko‘karishlarni qanday yashirayotganini ma’lum qildi
79 yoshli AQSH yetakchisining qo‘llarida ko‘p yillardan buyon yuqori dozada aspirin qabul qilishi oqibatida ko‘karishlar paydo bo‘lgan.
AQSH Prezidenti Donald Tramp jamoatchilikning sog‘lig‘iga bo‘lgan haddan tashqari e’tibori tufayli qo‘llaridagi ko‘karishlarni pardoz vositalari yordamida yashirayotganini tan oldi.
79 yoshli Amerika yetakchisi The Wall Street Journal nashriga bergan intervyusida qo‘llarining orqa qismiga maxsus tonal krem surtishini ma’lum qildi. Trampning so‘zlariga ko‘ra, bu jarayon atigi o‘n soniya vaqt oladi va tashqi ko‘rinishidagi kamchiliklarni tezkorlik bilan bartaraf etish imkonini beradi.
Prezident qo‘llarida ko‘karishlar paydo bo‘lishiga ko‘p yillardan buyon yuqori dozada aspirin qabul qilayotgani asosiy sabab ekanini tushuntirdi. U qonning quyuqlashib ketishidan saqlanish va yurak faoliyatini yaxshilash maqsadida ushbu dori vositasini muntazam ichib kelayotganini ta’kidlab o‘tdi.
Oq uy shifokori Shon Barbabellaning nashrga tasdiqlashicha, Donald Tramp har kuni 325 mg aspirin qabul qilmoqda. Bu ko‘rsatkich tibbiyot mutaxassislari tomonidan tavsiya etilgan odatiy me’yordan ancha yuqori hisoblanib, teri ostida qon talashishlar yuzaga kelishiga bevosita ta’sir ko‘rsatadi.
Kuzatuvchilar prezidentning ommaviy tadbirlarda, xususan, moliyaviy yordam to‘g‘risidagi farmonlarni imzolash jarayonida qo‘llarini yashirishga uringanini bir necha bor payqashgan. Ba’zi hollarda u jarohat izlarini tonal krem bilan yopgan bo‘lsa, boshqa vaziyatlarda qo‘llarini stol ostiga yashirishga harakat qilgan.
Avvalroq, Oq uy matbuot kotibi Kerolayn Livitt ushbu holatni tez-tez qo‘l berib ko‘rishishlar bilan izohlagan edi. Shunga qaramay, shifokorlar o‘tgan yilning yozida Trampda surunkali vena yetishmovchiligini aniqlashgan, biroq prezidentning umumiy salomatligi va kognitiv qobiliyati a’lo darajada ekanini qayd etishgan.
