Urush yillaridagi ulkan raqam: Ukraina G‘arbdan qancha mablag‘ olgani ochiqlandi
Ukraina Milliy banki raisi G‘arbdan jalb qilingan yordamni mamlakat rahbariyatining tizimli ishlari natijasi deb baholadi.
Rossiyaning keng ko‘lamli bosqini boshlanganidan beri Ukraina G‘arb davlatlaridan qariyb 200 milliard dollar to‘g‘ridan-to‘g‘ri budjet mablag‘ini oldi. Bu haqda Ukraina Milliy banki raisi Andrey Pishniy ma’lum qildi.
Uning ta’kidlashicha, mazkur mablag‘ mamlakat rahbariyati va hukumatining xalqaro hamkorlar bilan olib borgan tizimli ishlari natijasida jalb qilingan.
«Bu urushning har bir bosqichida dalillar topa olgan va samaradorlikni namoyish etgan Ukraina rasmiylari, Ukraina prezidenti, Ukraina hukumatining tizimli ishi natijasidir», — dedi Pishniy.
Ukraina budjeti
Ukraina Milliy banki ma’lumotlariga ko‘ra, urushgacha, 2021 yilda mamlakat davlat budjeti daromadlari o‘rtacha 47 milliard dollar, xarajatlari esa 54 milliard dollar atrofida bo‘lgan.
Taqqoslash uchun: joriy yilning iyun oyidagi o‘zgarishlarni hisobga olganda, Ukraina budjetining 2026 yilga mo‘ljallangan xarajatlari 143,24 milliard dollarga yetgan.
Davlat budjeti daromadlari 64 milliard dollar miqdorida belgilangan bo‘lib, shundan 3 milliard dollardan ortig‘i Ukraina Milliy banki foydasi hisobiga to‘g‘ri keladi.
Ukraina budjetidagi katta tafovut G‘arb davlatlari tomonidan ajratilayotgan moliyaviy yordam hisobiga qoplanmoqda.
