Yevropa Ittifoqi Ukrainaga 2,3 mlrd yevrolik oltinchi transhni ajratadi
Ukraina Yevropa Ittifoqi belgilagan asosiy islohot bosqichlarini bajarib, moliyaviy qo‘llovning navbatdagi yirik qismiga ega bo‘lmoqda.
Yevropa Ittifoqi Kengashi ma’lumotlariga ko‘ra, Ukraina Ukraine Facility mexanizmi doirasida 2,3 mlrd yevro miqdoridagi oltinchi transhni olish uchun talab qilingan shartlarni to‘liq bajardi. YI bu mablag‘ni mamlakatning makromoliyaviy barqarorligini mustahkamlash va davlat boshqaruvi tizimini qo‘llab-quvvatlashga yo‘naltiradi. Kengash bayonotida Ukraina sakkizta yangi qadam va avvalgi transhdan qolgan bitta talabni ham muvaffaqiyatli ado etgani ta’kidlandi.
Ukraine Facility dasturi bo‘yicha Ukraina hozirgacha belgilangan 68 shartning 63 tasini bajargan. Bundan oldin, noyabr oyi boshida Kiyevga 1,8 mlrd yevrodan ortiq mablag‘ o‘tkazilgan edi. YI Kengashi transhning davomiyligini Ukraina tomonining Yevroittifoqqa qo‘shilish maqsadlariga muvofiq islohotlarga sodiq qolishi bilan izohlamoqda.
So‘nggi yillarda Ukraina uchun yirik moliyaviy qo‘llovlar tasdiqlanib kelmoqda. Jumladan, 2025 yil aprelida 3,5 mlrd yevro, avgustda 3,2 mlrd yevro, 2024 yil dekabrida 4,1 mlrd yevro va avgustda 4,2 mlrd yevro ajratilgan. Shu bilan birga, YI Ukrainaga 6 mlrd yevrolik oraliq va 1,89 mlrd yevrolik avans moliyalashtirishni ham amalga oshirgan.
2024 yil mart oyida ishga tushirilgan Ukraine Facility mexanizmi 2027 yilgacha Ukrainaga 50 mlrd yevrogacha barqaror moliyaviy qo‘llov taqdim etishni ko‘zda tutadi. Brusselga ko‘ra, transhlar har chorakda, Yevrokomissiya islohotlar bajarilganini tasdiqlagandan so‘ng amalga oshiriladi. Mablag‘lar mamlakatning tiklanish rejasi, demokratik institutlar, qonun ustuvorligi va inson huquqlarini mustahkamlashga qaratilgan.
