YTTB Qozog‘istonning yirik yo‘l loyihasiga 229,5 mlrd tenge ajratdi
Loyiha avtomobil yo‘lining 234 kilometrini qamrab oladi. Qurib bitkazilgandan so‘ng, yo‘l asfalt-beton qoplamali va maksimal loyihaviy tezligi soatiga 120 km bo‘lgan to‘rt yo‘lakli birinchi toifali avtomobil yo‘liga aylantiriladi.
Qozog‘iston G‘arbiy Yevropa-G‘arbiy Xitoy transport yo‘lagining muhim qismini modernizatsiya qilish uchun Yevropa tiklanish va taraqqiyot bankidan (YTTB) 229,5 milliard tenge miqdorida mablag‘ jalb qildi.
Ushbu kelishuv Brusselda Transkaspiy xalqaro transport yo‘nalishini (TITR) rivojlantirish bo‘yicha xalqaro biznes konferensiyasida imzolandi.
Loyiha avtomobil yo‘lining 234 kilometrini qamrab oladi. Qurib bitkazilgandan so‘ng, yo‘l asfalt-beton qoplamali va maksimal loyihaviy tezligi soatiga 120 km bo‘lgan to‘rt yo‘lakli birinchi toifali avtomobil yo‘liga aylantiriladi.
“YTTB bilan tuzilgan kelishuv Qozog‘istonning eng yirik infratuzilma loyihalaridan birini amalga oshirishda muhim qadamdir. Bu shunchaki yo‘llarni rekonstruksiya qilish loyihasi emas, balki mamlakatning tranzit salohiyatiga, yo‘l harakati xavfsizligiga, Aqto‘be viloyatini rivojlantirishga va Qozog‘istonning Yevroosiyodagi asosiy transport markazi sifatidagi roliga investitsiyadir”,- deydi QazAvtoJol boshqaruvi raisi Darhan Imanashev.
Loyiha umumiy 523 milliard tengega baholanmoqda va Yevropa tiklanish va taraqqiyot banki (YTTB) va Osiyo infratuzilma investitsiya banki (AIIB) kabi xalqaro moliya institutlari ko‘magida moliyalashtirilmoqda.
Avtomagistral qurilish jarayonida 3000 dan ortiq ish o‘rinlarini va qurib bitkazilgandan so‘ng 124 ta doimiy ish o‘rinlarini yaratishi, taxminan 25,5 milliard tenge miqdorida iqtisodiy foyda keltirishi kutilmoqda.
