«Amazon» Ўзбекистонда интернет тарқатиш учун расмий дистрибюторини танлади

«Amazon»нинг сунъий йўлдош интернети лойиҳаси — «Amazon Leo» Ўзбекистонда хизмат кўрсатиш учун «Ўзбектелеком» билан ҳамкорлик қилади. Компания 22 сентябр куни UZ-SAT’ни мамлакатдаги ваколатли дистрибютор сифатида белгилаганини маълум қилди. Бу ҳақда «Amazon News» хабар берди.

Унга кўра, «Ўзбектелеком»нинг шўба компанияси UZ-SAT «Amazon Leo»нинг сунъий йўлдош тармоғидан фойдаланган ҳолда Ўзбекистондаги мижозларга янги уланиш ечимларини тақдим этади. Хабарда айтилишича, дистрибютор хизмати, айниқса, анъанавий интернет инфратузилмасини қуриш қийин бўлган тоғли ва чекка чўл ҳудудларидаги аҳоли ҳамда бизнес учун мўлжалланган.

«Ўзбектелеком» ҳозирда мамлакатдаги аҳоли пунктларининг 96 фоизини алоқа билан қамраб олган, 234 минг милдан (378 минг километрдан) ортиқ оптик толали инфратузилмага эга ҳамда 13 миллиондан зиёд фойдаланувчига хизмат кўрсатмоқда. Шунга қарамай, Ўзбекистоннинг тоғли ҳудудлардан тортиб, олис чўл аҳоли пунктларигача бўлган турли географик шароити айрим ҳудудларни фақат ер усти тармоқлари орқали интернетга улашни қийин ва қимматга айлантирмоқда. «Amazon Leo» «Uztelecom»нинг мавжуд инфратузилмасини тўлдириш ва алоқа энг зарур бўлган ҳудудларда интернет қамровини кенгайтириш учун мўлжалланган», — дейилади хабарда.

«Amazon Leo» қандай ишлайди?

«Amazon Leo» паст Ер орбитасида жойлашадиган 3 мингдан ортиқ сунъий йўлдош асосидаги тармоқни шакллантирмоқда. Тизим ердаги махсус шлюз антенналари ва оптик толали инфратузилма билан боғланади. Фойдаланувчилар эса махсус терминаллар орқали тармоққа уланади.

«Amazon»нинг сўнгги маълумотига кўра, 2 июл ҳолатида орбитадаги Leo сунъий йўлдошлари сони 396 тага етган. Компания тармоқни босқичма-босқич кенгайтирмоқда. Лойиҳа учун Leo Nano, Leo Pro ва Leo Ultra терминаллари ишлаб чиқилган. Компания маълумотларига кўра, уларнинг максимал юклаб олиш тезлиги мос равишда 100 Мбит/с, 400 Мбит/с ва 1 Гбит/с гача етиши мумкин. Бироқ бу кўрсаткичлар Ўзбекистондаги якуний тариф ёки тезликни англатмайди.

Ҳамкорлик июнда бошланган

«Amazon Leo» ва UZ-SAT ўртасидаги дастлабки ҳамкорлик келишуви 2026 йил июнида Тошкент халқаро инвестиция форуми доирасида имзоланган. Ўшанда Ўзбекистонда юқори тезликдаги сунъий йўлдош интернетини жорий этиш режаси маълум қилинган эди.

22 сентябрдаги янги хабар эса UZ-SAT’нинг Amazon Leo’нинг Ўзбекистондаги ваколатли дистрибютори сифатида ишлаши белгиланганини тасдиқлади. Хизматнинг Ўзбекистондаги аниқ тарифлари ва абонент тўловлари ҳозирча эълон қилинмаган.

«Amazon»нинг ўзи «Leo» тизимини юқори тезлик ва паст кечикишли интернет учун мўлжалланган тармоқ сифатида тавсифлайди. Терминаллар ҳам турли қувватда ишлайди.

Масалан, «Amazon» аввал «Leo Pro» қурилмаси учун 400 Мбит/с гача, «Leo Ultra» учун эса 1 Гбит/с гача юклаб олиш тезлигини кўрсатган. Бироқ бу кўрсаткичлар муайян хизмат шартлари ва бозорга қараб фарқ қилиши мумкин. Шунинг учун ҳозирча «Ўзбекистонда «Amazon Leo» интернети 1 Гбит/с бўлади» деб айтиш тўғри эмас — бу қурилманинг техник имконияти, холос.Starlink Ўзбекистон, Ўзбекистонда интернет, спутник интернет