«Google» беш мамлакатдаги ходимларига ихтиёрий ишдан кетишни таклиф қилди

«Google» Канада, Франция, Германия, Япония ва Швейцариядаги ходимларига компенсация тўловлари билан ихтиёрий ишдан кетиш дастурини кенгайтирди. Компанияга тегишли таклифлар айрим ходимларга июн ойида юборила бошланган.

«Google» вакилининг тушунтиришича, 2025-йилда бундай компенсация пакетлари фақат айрим жамоаларга таклиф қилинган, 2026-йилнинг ёзида эса дастурни бир нечта мамлакатда кенгайтиришга қарор қилинган. Бу қарор компаниянинг эгаси «Alphabet» акциялари қиймати пасайишига олиб келган сунъий интеллект харажатлари кўпайган бир пайтда қабул қилинган.

Аввалги ихтиёрий ишдан кетиш таклифлари «Google Cloud» ва «DeepMind» каби асосий бўлинмалар ходимларига тааллуқли бўлмаган. Бу сафар ҳам худди шундай тартиб қўлланилаётган бўлиши мумкин.

Жумладан, Швейцарияда дастур бир нечта бўлинмани қамраб олган, бироқ «DeepMind» ходимларига тааллуқли бўлмаган. Бу ҳақда вазиятдан хабардор учта манба агентликка маълум қилган. Манбалардан бирининг айтишича, тахминан 50 кишидан иборат жамоада камида тўрт ходим таклифни қабул қилган. Уларга компанияда ишлаган ҳар бир йили учун бир ойлик иш ҳақи миқдорида компенсация тўланган, бироқ тўлов муддати 12 ойдан ошмаган.

2023-йилда «Google» фақат Швейцариянинг ўзида 200 дан ортиқ ходимини ишдан бўшатган. Бу ўша пайтда норозилик намойишлари ва иш ташлашга сабаб бўлган. Ўша йилнинг бошида компания, асосан, АҚШда 12 минг ходимини ишдан бўшатишини эълон қилган эди.

Эслатиб ўтамиз, аввалроқ Ўзбекистонда электрон хизмат кўрсатувчи қайси хорижий компания энг кўп солиқ тўлаши ҳақида ёзган эдик. 2026-йилнинг 9 ойида мамлакатда электрон хизматлар кўрсатувчи 109 та хорижий компания қарийб 20 миллион доллар солиқ тўлаган.

^{Фарангиз Бобожонова}