Google тарихда илк бор 400 млрд доллар даромад олди
Alphabet компаниясига тегишли Google булутли хизматлар ва YouTube ўсиши ҳисобига рекорд молиявий натижани қайд этди.
Google’га эгалик қилувчи Alphabet компанияси ўз тарихида биринчи марта йиллик даромадини 400 миллиард доллардан оширганини маълум қилди. Бу кўрсаткич 2025 йилнинг тўртинчи чораги учун тақдим этилган молиявий ҳисоботда қайд этилган бўлиб, йиллик ўсиш суръати 15 фоизни ташкил этди.
Google Cloud келтирган йиллик даромади
Компания даромадининг ошиши, аввало, Google Cloud йўналишининг фаол кенгайиши билан боғлиқ. Ҳисоботга кўра, булутли хизматлар бўлими йил якунида 70 миллиард доллар даромад келтирган. Бу эса корхона сегментида рақамли инфратузилма ва маълумотлар билан ишлашга бўлган талаб ортиб бораётганини кўрсатади.
YouTube платформаси келтирган йиллик даромад
YouTube платформаси ҳам компания учун асосий даромад манбаларидан бири бўлиб қолмоқда. Реклама ва обуна хизматлари орқали видеохостингнинг йиллик даромади 60 миллиард доллардан ошиб кетган. Айниқса, YouTube Premium каби пулли хизматларга қизиқиш ортгани таъкидланмоқда.
Шунингдек, Google хизматларининг умумий пулли обуначилари сони 325 миллион нафардан ошган. Бу кўрсаткичга Google One ва YouTube Premium каби сервислар фойдаланувчилари ҳам киритилган бўлиб, компаниянинг экотизими барқарор ривожланаётганини англатади.
Gemini иловаси
Сунъий интеллект соҳасида ҳам ижобий динамика кузатилмоқда. Gemini иловаси аудиторияси ноябр ойида Gemini 3 модели ишга туширилгандан сўнг 750 миллион фойдаланувчидан ошиб кетган. Бундан ташқари, сунъий интеллект режими жорий этилгандан кейин Google қидирув тизимида кунлик сўровлар сони икки баробарга ошган.
Келгусида компания Gemini ва AI Mode платформаларида автоматлаштирилган тўлов функцияларини жорий этишни режалаштирмоқда, бу эса рақамли хизматлардан тижорий фойдаланишни янада кенгайтириши кутилмоқда.
