Миграция агентлигида 1 млрд сўмдан ортиқ талон-торожликлар фош этилди
Ташкилот ходимларига амалда ишламаган даври учун 931,6 млн сўм иш ҳақи сифатида тўлаб берилган. Етмаганига интизомий жазо чорасини олган ишчиларга ҳали бу жазо амал қилган даврда 88,5 млн сўм берилган.
Миграция агентлигининг масъул шахслари агентликнинг амалда ишламаган икки ходими учун 930 млн сўм тўлагани фош бўлди. Бу ҳақда Бош прокуратура ҳузуридаги департамент хабар берди.
Қайд этилишича, ташкилотнинг масъул шахслари агентлик ходимлари Б.Д. ва Н.А. нинг амалда ишламаган даври учун 931,6 млн сўм иш ҳақи сифатида тўлаб бериб, бюджет маблағларини растрата йўли билан талон-торож қилган.
Бундан ташқари, интизомий жазо чораси қўлланган ва жазо амал қилган даврда Меҳнат кодексининг талабларига зид равишда 8 ходимга 88,5 млн сўм тўлаб берилган.
Ҳолат юзасидан Жиноят кодексининг 167-моддаси (ўзлаштириш ёки растрата йўли билан талон-торож қилиш) билан жиноят иши қўзғатилиб, тергов ҳаракатлари ўтказилмоқда.
Эслатиб ўтамиз, аввалроқ 90 миллион доллар миқдорида зарар етказилгани айтилган Жанубий Кореяга ишга юбориш билан боғлиқ жиноят иши бўйича суд жараёни бўлиб ўтиши хабар қилинганди. Суд ажрим чиқариб, мажлис очиқ тартибда ўтказилишини, бироқ уни матбуотда ва ОАВда ёритиш ман этилишини маълум қилди.
