Европани заифликда айблаган Зеленскийга Давосда тик туриб қарсак чалишди

Жаҳон иқтисодий форумида сўзлаган Володимир Зеленский Европа Иттифоқини мустақил қарор қабул қилишга қодир эмасликда очиқ танқид қилди.

Унинг айтишича, Европа бир йил олдин ҳам ўзини ҳимоя қилишга қодир бўлиши керак эди, аммо шу вақт ичида амалда ҳеч нарса ўзгармади.

Зеленский Европа етакчилари ҳанузгача АҚШдан сигнал кутaётганини, стратегик ташаббус кўрсатишдан қочаётганини таъкидлади.

«Россиянинг мусодара қилинган активларини Украинага ёрдам сифатида ишлатишдан бош тортилаётгани сиёсий ироданинг йўқлигини кўрсатади», — деди у.

Украина президентига кўра, АҚШ қўллаб-қувватламасдан тинчликка эришиш мушкул, аммо Европа хавфсизлигини тўлиқ Вашингтонга юклаш ҳам хатарли йўл ҳисобланади.

Россия, нефт ва жавобгарлик масаласи

Зеленский Европа давлатларини Россияни жавобгарликка тортишда сусткашлик қилаётганликда ҳам айблади.

У халқаро муҳокамаларда Халқаро жиноят суди мавзусидан қочилаётганини, махсус трибунал яратиш борасида эса ҳеч қандай аниқ натижа йўқлигини таъкидлади. У қиёс сифатида Доналд Трамп маъмуриятининг танкерларни тўхтатиш ва нефтни мусодара қилиш амалиётини келтирди.

«Модомики АҚШ шундай қила олаётган экан, нима учун Европа Россия нефтини тўхтата олмайди?” — дея савол берди Зеленский.

Унинг фикрича, Россия нефтини мусодара қилиш ва уни сотишдан тушган маблағни Украина ҳамда Европа хавфсизлиги учун йўналтириш урушни молиялаштириш манбаларини кескин қисқартиради.

Гренландия ва Европа мудофааси

Чиқиш давомида Зеленский Гренландия атрофидаги геосиёсий баҳсларга ҳам тўхталиб ўтди.

У Россия ва Хитой таҳдидлари ҳақида гапирар экан, Украина Қора денгизда қандай қарши туриш мумкинлигини амалда кўрсатиб берганини таъкидлади. Шу муносабат билан у Европа Иттифоқини бирлашган қуролли кучлар тузиш ҳақида жиддий ўйлашга чақирди.

Зеленскийнинг сўзларига кўра, агар Россия Балтика мамлакатларига ҳужум қилса ва АҚШ аралашмаса, Европа Иттифоқи ўзини қандай ҳимоя қила олишини аниқ билиши керак. У Европани «чиройли, аммо парчаланган кучлар мозайкаси» деб атаб, бу ҳолат замонавий геосиёсий воқеликда жиддий хатар туғдиришини билдирди.

Қайд этиш жоиз, Зеленскийнинг чиқиши тик турган ҳолда қарсаклар билан кутиб олинди.