Toshkentdagi yangi xalqaro aeroportining loyihasi Prezidentga taqdim qilindi

O‘zbekiston prezidenti Shavkat Mirziyoyevga transport infratuzilmasini modernizatsiya qilish doirasida amalga oshirilayotgan yirik loyihalar taqdim etildi. Taqdimotda Toshkentda yangi xalqaro aeroport barpo etish rejasining asosiy parametrlari muhokama qilindi.

Ma’lumotlarga ko‘ra, loyihaning birinchi bosqichida 208,4 ming kvadrat metrli yo‘lovchi terminali qurilishi ko‘zda tutilgan. Shuningdek, uzunligi 4 kilometrdan iborat ikkita uchish va qo‘nish yo‘lagi barpo etish rejalashtirilmoqda.

Yangi infratuzilma kelgusida poytaxtning aviatsiya imkoniyatlarini sezilarli darajada kengaytirishi kutilmoqda. Loyiha mamlakatning xalqaro transport xabiga aylanish strategiyasi bilan ham uyg‘un.

Quvvat va infratuzilma

Loyihaga muvofiq, yangi aeroport yiliga 20 milliongacha yo‘lovchiga xizmat ko‘rsatish imkoniyatiga ega bo‘ladi. Bu esa Toshkent orqali amalga oshiriladigan xalqaro parvozlar sonini keskin oshirishga xizmat qilishi mumkin.

Infratuzilma soatiga 30 ta samolyotning uchishi va qo‘nishini ta’minlashga mos ravishda barpo etiladi. Shu bilan birga, 169 ta havo kemasi uchun maxsus turish joylari tashkil etilishi rejalashtirilgan.

Qurilish va topshiriqlar

Hozirgi vaqtda yangi aeroport quriladigan hududda loyiha va qidiruv ishlari olib borilmoqda. Mutaxassislar kelgusi bosqichlar bo‘yicha texnik va iqtisodiy hisob-kitoblarni tayyorlamoqda.

Taqdimot yakunida prezident mutasaddilarga loyihalarni texnik va iqtisodiy jihatdan puxta ishlab chiqish bo‘yicha topshiriq berdi. Shuningdek, qurilish ishlarini zamonaviy standartlar asosida tashkil etish zarurligi ta’kidlandi.

Bundan tashqari, barpo etiladigan transport infratuzilmasining uzoq muddat barqaror ishlashi va samarali boshqarilishiga alohida e’tibor qaratish vazifasi qo‘yildi.

Yangi xalqaro aeroport

2025-yil 15-oktabrda Shavkat Mirziyoyev Toshkentdagi yangi xalqaro aeroport qurilishiga tamal toshini qo‘ygan.

Amaldagi aeroportning imkoniyatlari cheklangani sabab, yangi majmua O‘rta Chirchiq va Quyi Chirchiq tumanlaridagi 1300 gektar maydonda quriladi.

Loyiha Vision Invest (Saudiya Arabistoni), Sojitz (Yaponiya) va Incheon (Janubiy Koreya) kompaniyalaridan iborat xalqaro konsorsium ishtirokida amalga oshiriladi. Birinchi bosqichda qiymati 2,5 mlrd bo‘lgan aerovokzal va aerodrom quriladi. Yangi aeroport yiliga 20 mln yo‘lovchi va 129 ming tonna yukni qayta ishlashga, soatiga 30 ta parvozni ta’minlashga qodir bo‘ladi.

Kompleks xalqaro fuqarolik aviatsiyasi standartlariga to‘liq javob beradi. Har qanday ob-havo sharoitida samolyotlarni qabul qilish imkonini beruvchi zamonaviy aeronavigatsiya tizimlari o‘rnatiladi. Loyihaning muhim jihati — uning ekologik barqarorligi: bu Markaziy Osiyodagi ilk «yashil» standartli aeroport bo‘ladi. Terminaldagi Duty Free zonasi 46 ming kvadrat metrni tashkil etadi.