Сунъий интеллект урушга кирди: «Grok» Эронда АҚШга ёрдам берган

Пентагон Илoн Маскнинг «xAI» компанияси томонидан ишлаб чиқилган «Grok» сунъий интеллект тизимидан Эронга қарши ҳарбий амалиётларда фойдаланган. Бу ҳақда «Wired» журнали АҚШ Мудофаа вазирлигининг рақамли технологиялар ва сунъий интеллект бўйича бош мутахассиси Кэмерон Стэнлининг баёнотига таяниб хабар қилди.

Унинг сўзларига кўра, «Grok» ҳозирда АҚШнинг сунъий интеллект орқали нишонларни аниқлаш дастури ҳисобланган «Maven Smart Systems» лойиҳаси таркибида ишлатилмоқда. Мазкур тизим аввал «Anthropic» компаниясининг «Claude» модели асосида фаолият юритган.

Стэнли «Grok» бошқарув модели орқали оператив самарадорлик сезиларли даражада ошганини таъкидлаган. Унинг маълум қилишича, «Maven Smart Systems» тизимлари «Эпик ғазаб» операцияси давомида 96 соат ичида 2 мингдан ортиқ нишонга нисбатан 2 мингдан зиёд ўқ-дорини қўллаш имконини берган.

«Claude» ўрнини «Grok» эгаллади

Маълум қилинишича, Пентагон аввал махфий тизимларда фақат «Claude» моделидан фойдаланишга рухсат берган. Бироқ 2026 йил март ойида АҚШ ҳарбий идораси «Anthropic»ни таъминот занжири учун хавф сифатида баҳолаб, амалда компания билан ҳамкорликни тўхтатган.

Нашрнинг ёзишича, келишмовчилик Пентагоннинг сунъий интеллект маҳсулотларидан «барча қонуний мақсадларда» фойдаланиш истаги билан боғлиқ бўлган.

«Anthropic» раҳбарияти эса икки муҳим чекловни талаб қилган. Улар технологияларни мамлакат ичида оммавий кузатув учун ҳамда инсон иштирокисиз ҳалокатли қарор қабул қилувчи автоном қурол тизимларини яратишда қўлламаслик шартларини илгари сурган.