Эрон Ҳўрмуз бўғозидаги портдан Қозоғистонга ер ажратади
Шунингдек, Эрон Қозоғистонга Жанубий ва Жануби-Шарқий Осиё бозорларига тўғридан-тўғри чиқиш имконини берувчи Чабаҳор портида ишлаш имкониятларини тақдим этишга тайёрлигини тасдиқлади.
© Foto: primeminister.kzЭрон Ҳўрмуз бўғозидаги портдан Қозоғистонга ер участкасини ажратади, Остона эса бунга жавобан Каспий денгизидаги портлари инфратузилмасини Теҳронга тақдим этишга тайёр. Бу ҳақда Қозоғистон Республикаси ҳукумати матбуот хизмати хабар берди.
Ушбу масала Остонада Эрон йўллар ва шаҳарсозлик вазири Фарзана Садек бошчилигидаги делегация билан бўлиб ўтган учрашувда муҳокама қилинди. Музокараларнинг асосий мавзуларидан бири порт инфратузилмасини ривожлантириш бўлди.
Эрон томони Бендер-Аббос шаҳридаги (Ҳўрмуз бўғози шимолий қирғоғи) Шаҳид Ражаи портида Қозоғистонга ер участкаси ажратиш масаласини мувофиқлаштириш якунланганини билдирди. Зарур процедуралар тугагач, майдон Қозоғистон томонига топширилади.
Шунингдек, Эрон Қозоғистонга Жанубий ва Жануби-Шарқий Осиё бозорларига тўғридан-тўғри чиқиш имконини берувчи «Чобаҳор» портида ишлаш имкониятларини тақдим этишга тайёрлигини тасдиқлади. Вазир Фарзана Садекнинг маълумотларига кўра, Зоҳидон – Чабаҳор темир йўл тармоғи қурилиши 90 фоиздан ортиққа бажарилган ва яқин ойларда ишга туширилади.
Бу орқали порт Ҳинд океани, Марказий Осиё ва Европани боғловчи халқаро темир йўл тармоғига интеграция қилинади. Ўз навбатида, Қозоғистон Эрон компанияларининг логистик фаолиятини ривожлантириш учун Оқтау ва Қуриқ портларидаги майдонлар, причаллар ва терминалларни тақдим этишни кўриб чиқишга тайёр.
Транспорт йўлаклари ва логистика
Учрашувда «Шимол — Жануб» халқаро транспорт йўлагини ривожлантириш масаласига алоҳида эътибор қаратилди. 2025 йил якунларига кўра, мазкур йўлак бўйича ташувлар ҳажми 12 фоизга ошиб, 3,5 миллион тоннага етди. Икки давлат ўртасидаги темир йўл ташувлари эса 69 фоизга ўсди. Қозоғистон вакили Серик Жумангарин маршрут салоҳиятини кенгайтириш учун транспорт инфратузилмасини модернизация қилиш бўйича қўшма Йўл харитасини ишлаб чиқишни таклиф қилди.
Бу йўлакнинг ўтказиш қобилиятини йилига 20 миллион тоннагача ошириш имконини беради. Томонлар Хитой, Қозоғистон, Туркманистон,
Эрон ва Туркия ўртасида имзоланган беш томонлама темир йўл битими ҳамда Қозоғистон, Россия, Туркманистон ва Эрон ўртасидаги кутилаётган тўрт томонлама тариф келишуви савдо ва транзит ўсиши учун қўшимча шароитлар яратишини таъкидладилар.
