Камар тақмасликка рухсат берувчи тиббий маълумотномалар онлайн берила бошлади
Хизмат хавфсизлик камарини тақишга тўсқинлик қилувчи касаллик ташхиси қўйилган фуқаролар учун мўлжалланган бўлиб, у тўлиқ бепул тақдим этилади.
Ўзбекистонда автотранспорт бошқарувида хавфсизлик камарини тақишга тўсқинлик қилувчи касалликка чалинган фуқаролар учун тиббий маълумотномани Ягона интерактив давлат хизматлари портали — my.gov.uz орқали онлайн олиш имконияти яратилди. Мазкур янгилик фуқароларни поликлиникаларда қайта-қайта қатнаш, навбат кутиш ва ортиқча қоғозбозликдан халос этишга қаратилган.
Хизмат хавфсизлик камарини тақишга тўсқинлик қилувчи касаллик ташхиси қўйилган фуқаролар учун мўлжалланган бўлиб, у тўлиқ бепул тақдим этилади. Қўшимча ҳужжатлар талаб қилинмайди. Фойдаланувчи my.gov.uz портали ёки мобил иловасига кириб, «Маълумотномалар» бўлимини танлаши ва ҳужжатни юклаб олиши мумкин.
Маълумотномани олиш тартиби ва қоидалар
Маълумотнома шаклланиши учун фуқаро аввал тиббиёт муассасасида шифокорлар кўригидан ўтган бўлиши шарт. Тиббий хулоса электрон базага киритилгач, ҳужжат порталда автоматик равишда шакллантирилади. Маълумотнома тиббий хулосада кўрсатилган муддат давомида амал қилади.
Маълумот учун, Соғлиқни сақлаш вазирининг 14 январдаги буйруғи билан хавфсизлик камарини тақиш имкони бўлмаган касалликлар ва ҳолатлар рўйхати тасдиқланган эди.
Йўл ҳаракати қоидаларига мувофиқ, ҳайдовчи ва олд ўриндиқдаги йўловчилар ҳаракатни бошлашдан олдин хавфсизлик камарини мажбурий тарзда тақиши лозим. Ҳайдовчи йўловчиларни камар тақишга огоҳлантириш мажбуриятига эга. Орка ўриндиқдаги йўловчилар учун бу талаб шартли бўлиб, 12 ёшгача бўлган болалар, ҳомиладор аёллар ва соғлиғи сабаб камар тақа олмайдиган шахслар бундан мустасно. Хавфсизлик камарини тақмаганлик ҳолатида ҳайдовчига жарима қўлланади ва 2025 йил ҳолатига кўра бу миқдор тахминан 206 000 сўмни ташкил этади.
