O‘zbekiston chegaralarini qo‘riqlaydigan Bayraktar, oyligi oshgan elchilar va arzon yashash bo‘yicha TOP-20 talik — 15-yanvar dayjesti

2025 yilda YTHlarda 2188 nafar inson halok bo‘lgan

2025 yil davomida O‘zbekistonda sodir bo‘lgan yo‘l-transport hodisalari oqibatida 2 188 nafar inson halok bo‘ldi va 8 901 kishi jarohatlandi. Bu ko‘rsatkich 2024 yilga (2 199 nafar halok bo‘lgan) nisbatan biroz kamaygan. E’tiborli jihati, so‘nggi besh yil ichida aholi soni 38 milliondan, transport vositalari esa 5,5 milliontadan oshgan bo‘lsa-da, YTHlardagi o‘lim darajasi har 100 ming aholiga nisbatan 6,9 tadan 5,7 taga tushgan. Ayniqsa, maktablar va mahallalar atrofida xavfsizlik choralarining kuchaytirilishi bolalar ishtirokidagi baxtsiz hodisalar kamayishiga ijobiy ta’sir ko‘rsatdi.

Mutaxassislarning ta’kidlashicha, YTHlar nafaqat insoniy fojia, balki iqtisodiy yo‘qotish hamdir; ayrim davlatlarda bunday holatlar YAIMning 3–5 foizigacha zarar keltirishi mumkin. Hozirda O‘zbekiston MDH davlatlari orasida yo‘llardagi xavfsizlik ko‘rsatkichlari bo‘yicha eng yaxshi natijalardan birini qayd etmoqda. Shunga qaramay, JSST ma’lumotlariga ko‘ra, avariyalar hali ham 29 yoshgacha bo‘lgan yoshlar o‘limining asosiy omillaridan biri bo‘lib qolmoqda va sohada xavfsizlikni ta’minlash choralari izchil davom ettirilmoqda.

O‘zbekiston chegaralari Bayraktar dronlari bilan qo‘riqlanadi

O‘zbekiston Davlat xavfsizlik xizmati raisi Bahodir Qurbonov Xavfsizlik kengashi yig‘ilishida "Bayraktar" uchuvchisiz uchish apparatlari bilan jihozlangan yangi maxsus bo‘linma jangovar navbatchilikni boshlaganini ma’lum qildi. Hozirda davlat chegaralarining 42 foizi videokuzatuv tizimlari bilan qamrab olingan bo‘lib, 1117 kilometr masofaga optik tolali aloqa liniyalari yotqizilgan. Bu tizim chegaradagi vaziyatni real vaqt rejimida kuzatish va xavflarni masofadan turib erta aniqlash imkonini bermoqda.

Chegara qo‘shinlarining moddiy-texnik ta’minoti ham keskin yaxshilangan: bo‘linmalar qurol-yarog‘ bilan 100%, avtozirhli texnika bilan 98% va elektron-optik vositalar bilan 78% darajada ta’minlangan. Zamonaviy uchuvchisiz apparatlar va raqamli texnologiyalarning joriy etilishi chegara nazoratining tezkorligi va samaradorligini yangi bosqichga olib chiqdi. Eslatib o‘tamiz, Turkiyada ishlab chiqarilgan ushbu dronlar avvalroq Surxondaryodagi poligonda muvaffaqiyatli sinovdan o‘tkazilgan edi.

Elchi faqat siyosatchimas: Prezident oyligi oshgan elchilarga qat’iy talab qo‘ydi

Prezident Shavkat Mirziyoyev raisligida o‘tkazilgan videoselektor yig‘ilishida O‘zbekistonning xorijdagi diplomatik vakolatxonalari va Tashqi ishlar vazirligi xodimlarining ish haqi oshirilgani ma’lum qilindi. Davlat rahbari elchilar faqat siyosatchi emas, balki iqtisodiy diplomatiya drayveri bo‘lishi kerakligini qat’iy ta’kidladi. Endilikda elchilar faoliyati faqat siyosiy muloqot bilan emas, balki aniq natijalar — jalb qilingan investitsiyalar, yangi eksport bozorlari, turistlar oqimi va fuqarolar huquqlarini himoya qilish darajasi (KPI) asosida baholanadi.

Mamlakat tarixida ilk bor tashqi savdo aylanmasi 80 milliard dollardan oshgani qayd etilib, iqtisodiy xavfsizlik davlat xavfsizligining asosi ekani aytib o‘tildi. Prezident elchilar oldiga yangi texnologiyalarni olib kelish, transport-logistika yo‘laklarini kengaytirish va qonuniy mehnat migratsiyasi uchun sharoit yaratish vazifasini qo‘ydi. Bundan buyon har bir diplomatik vakolatxona inson qadrini yuksaltirish va aholi daromadlarini oshirishga xizmat qiluvchi iqtisodiy ko‘rsatkichlar uchun bevosita mas’ul bo‘ladi.

O‘zbekistonliklar uchun AQSH vizalari olishda o‘zgarish yo‘q — TIV

Tashqi ishlar vazirligi matbuot kotibi Ahror Burhonov AQSH vizalarini rasmiylashtirish bo‘yicha tarqalgan xabarlarga munosabat bildirib, O‘zbekiston fuqarolari uchun hech qanday cheklov joriy etilmaganini ma’lum qildi. Unga ko‘ra, viza hujjatlari odatdagi tartibda ko‘rib chiqilmoqda. Bu bayonot "The Guardian" nashri tomonidan AQSH 75 ta davlat, jumladan, O‘zbekiston uchun ham viza berishni to‘xtatgani haqidagi asossiz xabarlardan so‘ng e’lon qilindi.