Россия нефт экспорти қувватларининг 40 фоизи вақтинча ишламай қолди – «Reuters»
Украина дронлари томонидан Россия нефт терминалларига уюштирилган ҳужумлар ва Европада «соя флоти» танкерлари тўхтатилиши натижасида Россия нефт экспорти қувватларининг тахминан 40 фоизи вақтинча ишламай қолди.
Украина ҳужумлари ва «соя флоти» танкерлари тўхтатилиши натижасида, Россиянинг чет элга нефт етказиб бериш қувватларининг тахминан 40 фоизи (кунига 2 млн баррел) вақтинча ишламай қолди, деб хабар берди «Reuters» 25-март куни, бозор маълумотларига асосланган ўз ҳисоб-китобларига таянган ҳолда.
Агентлик баҳолашича, бу замонавий Россия тарихидаги энг жиддий нефт таъминоти бузилиши бўлди. Бу воқеа АҚШ ва Исроилнинг Эронга қарши уруши туфайли нефт нархи баррелига 100 доллардан ошган бир пайтда содир бўлди.
«Reuters»нинг ёзишича, 2026-йил март ойида Украина дронлари Болтиқ денгизидаги экспорт портларига (Приморск ва Уст-Луга) ҳужум қилгандан сўнг, нефт жўнатмалари тўхтаб қолди. Қора денгиздаги Россия экспорт порти – Новороссийскда ҳам жўнатмалар режалаштирилган даражадан паст амалга оширилмоқда.
Шунингдек, «Дружба» нефт қувури зарар кўриши оқибатида, у орқали транзит январ охирида, Россия Украинага ҳужум қилганидан сўнг тўхтаб қолгани таъсир қилмоқда. «Reuters»га гапирган нефт савдогарлари, Европа давлатларининг «соя флоти»га кирувчи Россия танкерларини тез-тез тўхтатиши Мурманскдан 300 минг баррел ҳажмидаги жўнатмаларга ҳам таъсир қилганини айтди.
Агентлик ҳисоблашича, Россия Хитойга (кунига тахминан 1,9 млн баррел) ва Беларусга (300 минг баррел) нефт етказиб беришни узлуксиз давом эттирмоқда, шунингдек, «Сахалин-1» ва «Сахалин-2» лойиҳаларидан 250 минг баррел нефт жўнатмоқда.
«Goldman Sachs» 2026-йил учун нефт нархи прогнозини баррелига 85 долларга кўтаради
Аввалроқ, «Goldman Sachs» банки 2026-йил учун «Brent» нефт нархи прогнозини 77 дан 85 долларга кўтариб, буни глобал нефт бозоридаги тарихдаги энг катта таклиф шокларидан бири сифатида таърифлаган.
Банк таҳлилчилари ҳисоб-китобларида Ҳўрмуз бўғозидан ўтадиган етказиб бериш ҳажми нормал даражанинг 5 фоизида олти ҳафта давом этади, ундан сўнг тикланиш яна бир ойни олади, деб тахмин қилган. Шу сценарий бўйича жами йўқотишлар 800 млн баррел атрофида бўлади.
«Goldman Sachs» огоҳлантирадики, агар Ҳўрмуз бўғози очилгач тикланиш тўрт ҳафта давомида секин амалга ошса, Яқин Шарқда қазиб олиш ҳажмидаги йўқотиш ҳозирги 11 млн баррелдан 17 млн баррелгача ошиши мумкин.
