41 та хорижий атаманинг ўзбек тилидаги муқобили тасдиқланди
Энди «бренд» сўзи «хосном», «брекет» сўзи «тишсим», «эможи» эса «ҳисбелги» деб юритилади.
© wikipedia.uzВазирлар Маҳкамаси ҳузуридаги Атамалар комиссияси томонидан ўзбек тили қоидалари ва меъёрлари асосида шакллантирилган ҳамда расмий муомалага, қонунчилик ҳужжатларига ва расмий иш юритишга киритиладиган янги сўз ва атамалар рўйхати тасдиқланди.
Унга кўра, жами 41 та чет тилидан ўзлашган сўз ўзбекча муқобиллари билан алмаштирилади. Хусусан, энди расмий доираларда қуйидаги атамалардан фойдаланилади:
Санъат ва маданият соҳасида: Аккомпанемент ўрнига жўрнавоз, антракт ўрнига танафсус, арерсена ўрнига саҳнаорти, декорация ўрнига саҳнабезак, суфлёр ўрнига шивирчи.
Ахборот технологиялари ва ижтимоий тармоқларда: Вебинар ўрнига вебйиғин, комментарий ўрнига изоҳ, эможи ўрнига ҳисбелги, хештег ўрнига калитсўз, пробел ўрнига бўшлиқ.
Шунингдек, датчик ўрнига сезгич, миксер ўрнига қорғич, пенопласт ўрнига пўкак, пеноблок ўрнига пўкак ғишт, раковина ўрнига чаноқ, рубильник ўрнига узгич, башмак ўрнига бошмоқ сўзлари ишлатилади.
Кундалик ҳаёт, меҳнат ва туризмда: Банкет ўрнига зиёфат, брекетлар ўрнига тишсим, бренд ўрнига хосном, дедлайн ўрнига сўнгмуддат, инвентаризация ўрнига хатлов, интерактив ўрнига интерфаол, палатка ўрнига чодир, негатив ўрнига салбий, распродажа ўрнига арзонсотув, симптом ўрнига белги, аломат, тренинг ўрнига машғулот, фитосанитария ўрнига фитоҳимоя, фрилансер ўрнига эркин ишчи, шпалер ўрнига токустун ҳамда хостел ўрнига қўноқуй атамалари киритилмоқда.
Қуйидаги ҳавола орқали янги атамаларнинг маъноси билан тўлиқ танишиб чиқишингиз мумкин.
Эслатиб ўтамиз, аввалроқ 66 та хорижий атаманинг ўзбек тилидаги муқобили тасдиқлангани ҳақида хабар берган эдик. Бундан ташқари, 7-июл куни ўзбек алифбосига ҳам ўзгартиришлар киритилган эди.
