Ilhom Aliyev O‘zbekiston prezidentini «Haydar Aliyev» ordeni bilan taqdirladi

Ko‘ksaroy qarorgohida O‘zbekiston va Ozarboyjon prezidentlarini ikki mamlakatning oliy davlat mukofotlari bilan taqdirlash marosimi bo‘lib o‘tdi. Bu haqda Prezident matbuot xizmati xabar berdi.

Unga ko‘ra, Ozarboyjon prezidentining qardosh mamlakatlar o‘rtasidagi do‘stlik, strategik sheriklik va ittifoqchilik munosabatlarini mustahkamlashdagi xizmatlariga nisbatan O‘zbekiston xalqining samimiy hurmati va e’tirofining ifodasi sifatida Ilhom Aliyevga O‘zbekistonning oliy davlat mukofoti — «Oliy Darajali Do‘stlik» ordeni topshirildi.

«Siz ulug‘ otangiz — atoqli davlat arbobi Haydar Aliyevning ishini munosib davom ettirmoqdasiz. Sizning rahbarligingizdagi oqilona islohotlar tufayli Ozarboyjon taraqqiyot borasida va xalqaro maydonda ulkan yutuqlarga erishmoqda», — dedi Mirziyoyev.

Ilhom Aliyevning O‘zbekiston – Ozarboyjon ko‘p qirrali munosabatlarini kengaytirishga qo‘shayotgan hissasi ham alohida mamnuniyat bilan qayd etildi. Aliyev yuksak e’tirof uchun Shavkat Mirziyoyev va O‘zbekiston xalqiga minnatdorlik izhor etib, do‘stlik va o‘zaro hurmat ruhidagi har tomonlama hamkorlik yanada mustahkamlanishiga ishonch bildirdi.

Shundan so‘ng O‘zbekiston prezidenti Ozarboyjonning oliy davlat mukofoti — «Haydar Aliyev» ordeni bilan taqdirlandi. Mukofotni Aliyevning o‘zi topshirdi.

O‘zbekiston yetakchisi Ozarboyjon prezidenti va qardosh Ozarboyjon xalqiga chuqur minnatdorlik bildirib, ushbu mukofotni abadiy do‘stlik, strategik sheriklik va ittifoqchilik munosabatlarini mustahkamlash yo‘lidagi qo‘shma sa’y-harakatlarga berilgan yuksak baho sifatida qabul qilishini ta’kidladi.

«Mazkur orden men uchun alohida ahamiyatga ega. Unga butun umrini vataniga xizmat qilishga bag‘ishlagan ulug‘ davlat arbobi Haydar Aliyevich Aliyevning nomi berilgan. Aynan shu inson Ozarboyjonning kelgusi taraqqiyoti uchun mustahkam poydevor yaratdi», — dedi Shavkat Mirziyoyev.

Haydar Aliyev O‘zbekiston tarixi va madaniyatini yuksak qadrlagani, ikki xalq yaqinlashuviga salmoqli hissa qo‘shgani ta’kidlandi. O‘zbekiston va Ozarboyjon kelgusida ham barcha sohalarda hamkorlikni kengaytirib, qardoshlik munosabatlari esa yangi amaliy mazmun bilan boyib borishiga ishonch bildirildi.

Ma’lumot uchun, «Haydar Aliyev» ordeniga turli yillarda Fransiya prezidenti Jak Shirak, Quvayt amiri Saboh as-Saboh, Turkiya prezidenti Rajap Toyyib Erdo‘g‘an, Italiya prezidenti Serjo Mattarella va boshqa ko‘plab davlat arboblari sazovor bo‘lgan.

Eslatib o‘tamiz, avvalroq O‘zbekiston va Ozarboyjon prezidentlari Oliy davlatlararo kengashning uchinchi yig‘ilishini o‘tkazgandi.