Banklar naqd pul yechib olishda bankomatda qancha olib qoladi?
Uzcard va HUMO kartalaridan bankomat orqali naqd pul yechishda aksariyat banklarda komissiya — 1 foiz. Ma’lum summagacha komissiya olmaydigan banklar ham bor. Naqd pul yechishdan oldin karta turi, oylik limit, aksiya muddati va bankomatda ko‘rsatilgan yakuniy komissiyani tekshirish kerak.
© Foto: rg.ruO‘zbekistonda banklarning 2026-yil 9-noyabr holatiga ochiq e’lon qilingan tariflariga ko‘ra, Uzcard va HUMO kartalaridan bankomat orqali naqd pul yechish uchun aksariyat banklarda 1 foiz komissiya belgilangan.
Biroq ayrim banklarda o‘z kartalari uchun bundan past stavkalar ham mavjud. Masalan, «Davrbank»ning bankomatlaridan pul yechib olinayotganda naqdlashtirib olinayotgan pulning 0,5 foizi komissiya uchun olib qolinadi. Bank tomonidan chiqarilgan Uzcard va HUMO kartalaridan o‘z bankomatlari orqali naqd pul yechilganda 0,5 foiz komissiya olinadi.
«Asakabank»da bu xizmat 0,7 foiz qilib qo‘yilgan. Bankning ayrim Uzcard va HUMO kartalari uchun o‘z bankomatlarida 0,7 foiz komissiya belgilangan. Masalan, Uzcard Black kartasida ushbu stavka amal qiladi.
«Garant bank» esa o‘zining Uzcard va HUMO kartalaridan naqd pul yechish uchun 0,7 foiz, boshqa banklarning ushbu kartalaridan esa 1 foiz komissiya oladi.
«O‘zmilliybank», «Xalq banki», «Agrobank», «O‘zsanoatqurilishbank», «Biznesni rivojlantirish banki», «Mikrokreditbank», «Turonbank», «Aloqabank», «Ipoteka-bank», «Hamkorbank», «Ipak Yo‘li banki», «Trastbank», «Kapitalbank», «Anorbank», «Asia Alliance Bank», «Infinbank», «Octobank», «Universalbank», «Poytaxt bank», «Orient Finans Bank», «APEX BANK» va «Tenge Bank» banklarida Uzcard va HUMO kartalaridan naqd pul yechishning asosiy bankomat tarifi 1 foiz atrofida bo‘lib, ayrim karta mahsulotlari va maxsus shartlarda farq qilishi mumkin.
Komissiyasiz naqd pul yechish imkoniyati qaysi banklarda bor?
«TBC Bank»ning 1-noyabrdan amal qilayotgan yangi karta paketi doirasida Visa hamda qo‘shimcha Uzcard yoki HUMO kartalarining har biri uchun oyiga 5 million so‘mgacha naqdlashtirish komissiyasi qaytariladi. Alohida Uzcard tarifi bo‘yicha 10 million so‘mgacha imtiyoz ham mavjud.
«Uzum Bank»ning o‘z bankomatlaridan oyiga 10 million so‘mgacha 0 foiz komissiya bilan pul yechish mumkin. Boshqa bank bankomatlarida esa aksiya shartlari bajarilsa, 2 million so‘mgacha naqdlashtirish komissiyasi 15 daqiqa ichida keshbek sifatida qaytariladi. Aksiya joriy yil 1-iyundan amal qilmoqda.
Qolaversa, «Kapitalbank»ning o‘z bankomatlarida oyiga 10 million so‘mgacha 0 foiz, undan yuqori summa uchun 0,7 foiz komissiya belgilangan.
«Hamkorbank»ning o‘z bankomatlaridan oyiga 3 million so‘mgacha 0 foiz, limitdan yuqori summa uchun 1 foiz komissiya olinadi.
Shuningdek, «InfinBANK». Bankning o‘z bankomatlarida naqdlashtirish 0 foiz. Biroq Classic Zero uchun oyiga 1 dollar, Platinum Zero uchun 5 dollar abonent to‘lovi bor. Mos ravishda 200 va 1000 dollarlik minimal qoldiq saqlansa, abonent to‘lovi undirilmaydi.
Uzcard va HUMO kartalarining odatdagi komissiyalari bilan Visa kabi maxsus kartalarga berilgan imtiyozlarni adashtirmaslik kerak. Shuningdek, 0 foiz komissiya va keyinchalik komissiyani keshbek sifatida qaytarish turli shartlar hisoblanadi. Naqd pul yechishdan oldin karta turi, oylik limit, aksiya muddati va bankomatda ko‘rsatilgan yakuniy komissiyani tekshirish kerak.
Eslatib o‘tamiz, avvalroq Markaziy bank bank va to‘lov tashkilotlarini bankomat pul yechmagan holatlarni xolis tekshirishga chaqirgandi. Shuningdek, O‘zbekiston bankomatlar importidan voz kechishi mumkin.
