Ar-Riyoddagi «Saudi Aramco» ofisi raketa parchalaridan zararlandi

Saudiya Arabistoni Energetika vazirligi Ar-Riyod shahrida joylashgan «Saudi Aramco» neft kompaniyasining ma’muriy binosi husiylar tomonidan uchirilgan raketalar qoldiqlari tufayli zarar ko‘rganini ma’lum qildi. Bu haqda «Al Jazeera» telekanali xabar berdi.

​Vazirlik vakillarining aniqlik kiritishicha, ma’muriy binoga «tushayotgan parchalar» shikast yetkazgan. Hodisa oqibatida ko‘p qavatli binoning bir nechta qavatida deraza oynalari sinib ketgan, qurbonlar va jarohatlanganlar qayd etilmagan.

​Ilgariroq axborot agentliklari Podshoh Abdulla nomidagi moliyaviy mavzeda (KAFD) joylashgan va «Saudi Aramco»ga tegishli bo‘lgan minora shikastlangani haqida xabar bergan edi. Ushbu mavzeda 140 dan ortiq kompaniya va xalqaro firmalarning 25 ta mintaqaviy shtab-kvartirasi joylashgan.

​Havo hujumidan mudofaa tizimlarining harakati
​«Saudi Aramco» ofisi zarar ko‘rgani haqidagi xabarlar Saudiya Arabistoni boshchiligidagi koalitsiya qirollik yo‘nalishida uchirilgan bir nechta ballistik va qanotli raketalar havo hujumidan mudofaa vositalari tomonidan yo‘q qilinganini bildirganidan so‘ng paydo bo‘ldi.

​Koalitsiya rasmiy vakili general-mayor Turki al-Malikining ta’kidlashicha, Yemen husiylari tomonidan ikkita raketa Ar-Riyod tomon, yana biri esa qirollikning Sharqiy provinsiyasi yo‘nalishida uchirilgan.