Deputatlar chiqindilarni utilizatsiya qilish muammosi yuzasidan so‘rov yo‘lladi
10.06.2025 | 16:2027983
Oliy Majlis Qonunchilik palatasi deputatlari Ekologiya vaziri Aziz Abduhakimov nomiga rasmiy parlament so‘rovini yo‘llashga qaror qildi. So‘rovda maishiy chiqindilarni zamonaviy usulda qayta ishlash va ekologik xavfli poligonlarni yopib, ularni rekultivatsiya qilish masalalari qamrab olingan.
Deputatlar respublikaning atrof-muhitni muhofaza qilish sohasidagi sa’y-harakatlarini e’tirof etar ekan, bir qator muhim muammolar hal etilmay qolib ketayotganini ta’kidlashdi. Jumladan, chiqindilarni to‘plash va qayta ishlash uchun mo‘ljallangan stansiyalar qurilishi kechikib, ifloslangan yerlar hanuz tiklanmagan.
Qonun chiqaruvchilarning fikricha, chiqindilarni toifalarga ajratish uchun maxsus QR-kodli o‘ramlar bilan ta’minlash, qayta ishlash texnologiyalarini joriy etish va sanitar tozalash korxonalarining texnik jihozlanishi borasida yetarli ishlar qilinmayapti. Shuningdek, ikkinchi xomashyoni qayta ishlovchi tadbirkorlar uchun «yashil subsidiyalar» tizimi ham ishlab chiqilmagan.
Alohida e’tibor talab qiluvchi masala sifatida deputatlar elektromobil akkumulyatorlarini utilizatsiya qilish bo‘yicha yechimlar mavjud emasligini qayd etishdi. Elektrotransport ommalashgan sari bu muammo yanada dolzarb tus olmoqda.
Parlament so‘rovi orqali vazirdan chiqindilarni boshqarish tizimini modernizatsiya qilish, poligonlarni yopish va atrof-muhitga xavf tug‘diradigan ob’ektlarni bartaraf etish bo‘yicha amalga oshirilayotgan ishlar yuzasidan to‘liq ma’lumot taqdim etishi so‘raldi.
