Sathi pasayayotgan Amudaryo, may oyida sotilmagan oltin va 56 mlrd so‘mga tushgan aholini ro‘yxatga olish — 1-iyul dayjesti

Amudaryodagi suv sathi sezilarli darajada pasaydi

«Science Direct»da e’lon qilingan tadqiqotga ko‘ra, Amudaryoning o‘rta va quyi oqimida suv miqdori 54–77 foizga kamaygan. Olimlar buning asosiy sababi iqlim o‘zgarishi emas, balki inson faoliyati ekanini ta’kidlamoqda. Xususan, sug‘orish uchun suv olish, kanallar, suv omborlari va nasos stansiyalari qurilishi daryo oqimini keskin kamaytirgan. Eng katta pasayish Qiziljar qismida qayd etilib, suv oqimi 77 foizga qisqargan.

Tadqiqotga ko‘ra, havzada yog‘ingarchilik 6–13 foizga oshgan bo‘lsa-da, inson ta’siri bu ijobiy omilni bartaraf etgan. Hozirda Amudaryo havzasidagi suvning taxminan 92 foizi qishloq xo‘jaligi ehtiyojlari uchun sarflanmoqda. Olimlar suv resurslarini saqlash uchun sug‘orish tizimlarini modernizatsiya qilish, suv tejovchi texnologiyalarni joriy etish va transchegaraviy hamkorlikni kuchaytirishni taklif qilmoqda.

Alisher Qodirov milliy jamoani avval tanqid qilib, keyin maqtagani sababini izohladi

«Milliy tiklanish» demokratik partiyasi raisi Alisher Qodirov milliy terma jamoani avval tanqid qilgani ularga yomonlik emas, balki jamoa kelajagi uchun qayg‘urishdan kelib chiqqanini bildirdi. Uning aytishicha, futbolchilarni kutib olishga chiqqan va tanqidlar jamoaga ruhiy ta’sir qilgan bo‘lishi mumkinligini tan olgan. Shu bilan birga, Qodirov terma jamoa o‘zbek futbolining kelajak rivoji uchun muhim tajriba orttirganini ta’kidladi.

Shuningdek, u darvozabon haqidagi tanqidlari futbolchilarning o‘ziga emas, balki ularni o‘yinga tayyorlaydigan mutaxassislarga qaratilganini bildirdi. Avvalroq Qodirov milliy jamoada yosh futbolchilarga ko‘proq imkoniyat berish, ayrim pozitsiyalarda tarkibni yangilash va bosh murabbiy atrofida raqobatbardosh jamoa shakllantirish zarurligini aytgan edi.

O‘zbekistonda aholini ro‘yxatga olish uchun qancha mablag‘ sarflangani ma’lum qilindi

Statistika qo‘mitasi raisi Behzod Hamroyevning ma’lum qilishicha, O‘zbekistonda aholini ro‘yxatga olish jarayoniga jami 56,4 mlrd so‘m (4,7 mln dollar) sarflangan. Bu bir nafar fuqaro hisobiga o‘rtacha 0,12 dollar to‘g‘ri keladi. Xarajatlar davlat budjeti hisobidan qoplangan bo‘lib, ularning asosiy qismi «mahalla yettiligi» xodimlarining mehnat haqiga sarflangan.

Qo‘mita ma’lumotiga ko‘ra, aholining 82 foizi onlayn ro‘yxatdan o‘tgani tufayli xarajatlar sezilarli darajada qisqargan. Rasmiylarga ko‘ra, agar jarayon to‘liq an’anaviy usulda o‘tkazilganida, xarajatlar kamida o‘n barobar ko‘p bo‘lardi. Ro‘yxatga olish natijalari esa bosqichma-bosqich Milliy statistika qo‘mitasi saytida umumlashtirilgan va shaxsga doir ma’lumotlar oshkor etilmagan holda e’lon qilinadi.

O‘zbekiston MOda havo yuk tashish hajmi bo‘yicha eng katta o‘sishga erishdi. Qozog‘iston yetakchi

Xalqaro havo transporti assotsiatsiyasi (IATA) hisobotiga ko‘ra, O‘zbekiston so‘nggi besh yilda havo yuk tashish hajmini 182 foizga oshirib, o‘sish sur’ati bo‘yicha Markaziy Osiyoda yetakchiga aylandi. Shu bilan birga, mutlaq hajm bo‘yicha Qozog‘iston yetakchilikni saqlab qolgan bo‘lib, uning havo yuk tashish ko‘rsatkichi 2019 yilga nisbatan 149 foizga o‘sgan.

IATA ma’lumotiga ko‘ra, mintaqadagi o‘sishning asosiy omili aeroportlar orqali bojxona rasmiylashtiruvisiz o‘tadigan to‘g‘ridan-to‘g‘ri tranzit yuklar hisoblanadi. Tahlilchilarning qayd etishicha, chiquvchi yuk hajmining o‘sishi Markaziy Osiyoni Yevropa va Xitoy o‘rtasidagi muhim logistika va konsolidatsiya markaziga aylantirayotganini ko‘rsatmoqda.

O‘zbekiston may oyida oltin sotmadi

Milliy statistika qo‘mitasi ma’lumotlariga ko‘ra, may oyida O‘zbekiston oltin eksport qilmagan. Natijada 2026 yilning dastlabki besh oyida eksport hajmi o‘tgan yilning shu davriga nisbatan 15,5 foizga kamayib, 12,6 mlrd dollarni tashkil etdi. Import esa 20,8 foizga oshib, 20,1 mlrd dollarga yetdi va tashqi savdodagi salbiy saldo 7,5 mlrd dollargacha ko‘paydi.

So‘nggi sakkiz oy ichida O‘zbekiston faqat 2026 yil aprel oyida 1,5 mlrd dollarlik oltin eksport qilgan. Tahlillarga ko‘ra, oltin eksportining to‘xtashiga jahon bozorida narxlarning keskin o‘zgarishi sabab bo‘lgan. Iyun oyida ham oltin narxlari pasaygani uchun hukumat bu davrda ham sotuvni amalga oshirmagan bo‘lishi mumkin.