Vakolati qisqartirilayotgan Markaziy bank, kamaygan oltin-valuta zaxiralari va Islom Karimov majmuasini ta’mirlashga 3,4 mlrd so‘m — 8-aprel dayjesti

O‘zbekistonda «muhim to‘lov tashkiloti» tushunchasi joriy etilmoqda

O‘zbekistonda «muhim to‘lov tashkiloti» tushunchasi joriy etilmoqda. Senat ma’qullagan qonunga ko‘ra, to‘lov tashkilotlari bozordagi ulushi, mijozlar soni va tranzaksiyalar hajmiga qarab ikki toifaga ajratiladi. Yirik kompaniyalar alohida «muhim to‘lov tashkiloti» sifatida belgilanib, ularga nisbatan kuchaytirilgan nazorat va talablar qo‘llaniladi.

Bu yondashuv riskka asoslangan nazoratni joriy etishga qaratilgan bo‘lib, kichik to‘lov tashkilotlari uchun bozorga kirish shartlari yengilroq saqlanadi. Hozirgi kunda bozorda 44 ta to‘lov tashkiloti faoliyat yuritib, ular orqali 333 trln so‘mlik operatsiyalar amalga oshirilgan. Yangi qonun orqali yirik ishtirokchilar ustidan qat’iy nazorat o‘rnatilib, bozor barqarorligini ta’minlash ko‘zda tutilmoqda.

Markaziy bank vakolati qisqartiriladi: ustav kapitali me’yorlari qonun bilan belgilanyapti

O‘zbekistonda to‘lov tashkilotlari va to‘lov tizimi operatorlari ustav kapitali bo‘yicha me’yorlar qonun darajasida belgilanmoqda. Senat ma’qullagan qonunga ko‘ra, to‘lov tizimi operatorlari uchun eng kam ustav kapitali 50 mlrd so‘m, to‘lov tashkilotlari uchun esa 20 mlrd so‘m etib belgilandi. Shu bilan birga, ushbu me’yorlarni belgilash bo‘yicha Markaziy bank vakolati bekor qilinib, talablar to‘g‘ridan-to‘g‘ri qonunga kiritildi.

Qonunga muvofiq, litsenziya olishdan oldin ustav kapitali to‘liq shakllantirilishi shart. Shuningdek, xorijiy investorlar ulushi 50 foizgacha cheklanib, qolgan qismi mahalliy rezidentlarga tegishli bo‘lishi belgilandi. Ushbu o‘zgarishlar bozorda davlat nazoratini kuchaytirish va moliyaviy barqarorlikni ta’minlashga qaratilgan.

O‘zbekiston Yaqin Sharqdagi sulh kelishuvini olqishladi

O‘zbekiston Tashqi ishlar vazirligi Pokiston vositachiligida Yaqin Sharqda o‘t ochishni to‘xtatish bo‘yicha erishilgan kelishuvni olqishladi. Bayonotda bu qadam keskinlikni yumshatish va siyosiy-diplomatik muloqotni davom ettirish uchun muhim ekani ta’kidlanib, barcha tomonlar vazminlikka va konstruktiv hamkorlikka chaqirildi. Shuningdek, O‘zbekiston mojarolarni faqat tinch yo‘l bilan hal etish pozitsiyasiga sodiq ekani yana bir bor qayd etildi.

Ma’lumotlarga ko‘ra, AQSH va Eron ikki haftalik shartli o‘t ochishni to‘xtatish bo‘yicha kelishuvga erishgan. U Pokiston vositachiligida amalga oshirilgan bo‘lib, Ho‘rmuz bo‘g‘ozini vaqtincha ochish va muzokaralarni davom ettirishni nazarda tutadi. Shu bilan birga, kelishuv atrofida noaniqliklar saqlanib qolmoqda, ayrim tomonlar pozitsiyasi va amalga kirish vaqti hali aniq emas.

O‘zbekiston oltin-valuta zaxiralari keskin qisqardi

2026 yil mart oyida O‘zbekistonning xalqaro oltin-valuta zaxiralari 10 foizga qisqarib, 68,99 mlrd dollarga tushdi. Markaziy bank ma’lumotiga ko‘ra, bir oy ichida zaxiralar 8,09 mlrd dollarga kamaygan bo‘lib, bu asosan jahon bozorida oltin narxining 5174,1 dollardan 4553,95 dollargacha pasayishi bilan izohlanadi.

Shu bilan birga, oltin zaxiralarining fizik hajmi oshgan: 0,3 mln troy unsiyaga ko‘payib, 13,4 mln troy unsiyaga (416,8 tonna) yetgan. Valuta zaxiralari esa 1,26 mlrd dollarga kamayib, 7,57 mlrd dollarni tashkil qildi, ayni paytda xorijiy aktivlar va qimmatli qog‘ozlar hajmida ayrim o‘sishlar qayd etildi.

Islom Karimov majmuasini ta’mirlashga 3,4 mlrd so‘m ajratildi

Toshkent shahridagi Islom Karimov nomidagi ilmiy-ma’rifiy yodgorlik majmuasini ta’mirlash va obodonlashtirish ishlari uchun 3 mlrd 435 mln so‘m ajratildi. Qaror 6-aprel kuni shahar hokimi tomonidan qabul qilingan bo‘lib, mablag‘lar Toshkent shahrini rivojlantirish jamg‘armasi hisobidan moliyalashtiriladi. Loyihani amalga oshirish uchun buyurtmachi sifatida «Yagona buyurtmachi xizmati» injiniring kompaniyasi belgilangan.

Qarorga muvofiq, kompaniya loyihalash va qurilish ishlari uchun pudratchilarni aniqlaydi, ajratilgan mablag‘larning maqsadli sarflanishi nazorat qilinadi. Mazkur majmua 2017 yilda Islom Karimov xotirasini abadiylashtirish maqsadida tashkil etilgan bo‘lib, muzey, ilmiy-tadqiqot markazi, kutubxona va konferensiya zalini o‘z ichiga oladi.