Зайд мукофотининг 2026 йилги лауреатлари эълон қилинди: Ҳакамлар ҳайъатида Саида Мирзиёева ҳам бор
Ўзбекистон Президенти Администрацияси раҳбари ушбу мукофотнинг мустақил халқаро ҳакамлар ҳайъати таркибидаги Марказий Осиёнинг биринчи ва ягона вакили ҳисобланади.
© Фото: Telegram / Saida Mirziyoyeva Бурж Халифа шаҳрида жойлашган Инсоний биродарлик бўйича Зайд мукофоти қўмитаси 2026 йилги лауреатлар номини очиқлади. Нуфузли мукофотга Арманистон ва Озарбайжон ўртасидаги тинчлик келишуви ҳамда афғонистонлик ҳуқуқ ҳимоячиси Зарқа Яфтали лойиқ деб топилди.
Инсоний биродарлик бўйича Зайд мукофотининг ҳакамлар ҳайъати 2026 йилги ғолибларни расман эълон қилди. Бу йилги танловда Жанубий Кавказда кўп йиллик зиддиятларга чек қўйган Арманистон ва Озарбайжон ўртасидаги «Тинчлик ва давлатлараро муносабатларни ўрнатиш тўғрисида»ги тарихий келишув юксак эътироф этилди. Шунингдек, афғонистонлик қизларнинг таълим олиш ҳуқуқлари йўлида фидокорона меҳнат қилаётган фаол Зарқа Яфтали ҳам халқаро мукофот соҳибига айланди.
Ушбу мукофот ғолибларини аниқлашда иштирок этган мустақил халқаро ҳакамлар ҳайъати таркибида Марказий Осиё минтақасидан ягона вакил сифатида Ўзбекистон Республикаси Президенти Администрацияси раҳбари Саида Мирзиёева иштирок этди. Саида Мирзиёева ўз чиқишида мазкур танлов тинчлик ва инсон қадр-қиммати тамойилларига нисбатан глобал ахлоқий мажбуриятни ифодалашини алоҳида таъкидлади. Унинг қайд этишича, бу эътироф халқаро ҳамжамиятга умид бағишлаб, инсоний биродарликнинг барқарор ўзгаришлар қилишга қодирлигини яна бир бор исботлайди.
Арманистон Бош вазири Никол Пашинян ва Озарбайжон Президенти Илҳом Алиев ушбу мукофот Кавказ минтақасида тинчлик ўрнатиш йўлидаги жамоавий меҳнатнинг маҳсули эканини билдирди. Томонлар мазкур эътироф икки давлат ўртасидаги ўзаро ишончни мустаҳкамлашга хизмат қилишини таъкидлаб, БАА асосчиси Шайх Зайд бин Султон Ол Наҳаён номидаги мукофотни олиш катта шараф эканини қайд этдилар. Иккинчи лауреат Зарқа Яфтали эса бу мукофот таълимдан узилган афғон қизлари учун кучли мотивация ва умид манбаи бўлишини айтди.
Маълумот ўрнида айтиш жоизки, Зайд мукофоти 2019 йилда Рим папаси Франциск ва Ал-Азҳар имоми Аҳмад ал-Тойиб томонидан имзоланган «Инсоний биродарлик тўғрисида»ги ҳужжат асосида таъсис этилган. Мукофот дунёда тинчлик ва ҳамжиҳатликни тарғиб қилувчи шахслар ҳамда ташкилотларни рағбатлантиришни мақсад қилган. Шу кунгача ушбу совринга дунёнинг 19 мамлакатидан турли соҳа вакиллари лойиқ кўрилган.
Тақдирлаш маросими 2026 йилнинг 4 феврал куни Абу-Даби шаҳрида, БМТ томонидан белгиланган Халқаро инсоний биродарлик кунида бўлиб ўтади. Тадбир «Муассис ёдгорлиги» мажмуасида ўтказилиб, дунё бўйлаб жонли эфирда намойиш этилади. Ушбу санада инсоният манфаати йўлида хизмат қилган янги қаҳрамонлар расман шарафланади.
