Зеленский билан учрашув олдидан Трамп Путинга қўнғироқ қилди
Доналд Трамп ва Владимир Путин ўртасидаги 75 дақиқалик телефон суҳбатида Украина уруши, Донбасс масаласи ва янги ишчи гуруҳлар тузиш бўйича келишувга эришилди.
АҚШ президенти Доналд Трамп Россия раҳбари Владимир Путин билан телефон орқали 75 дақиқа давом этган суҳбат ўтказди. Россия президенти ёрдамчиси Юрий Ушаковнинг айтишича, мулоқот дўстона, самимий ва ишчан руҳда ўтган. Суҳбат Трамп ташаббуси билан ташкил этилган бўлиб, асосий эътибор Украинадаги урушни тугатиш масаласига қаратилган.
Ушаковнинг маълум қилишича, Путин Трампнинг Украина бўйича махсус ишчи гуруҳлар тузиш таклифига розилик билдирган. Мазкур гуруҳларнинг аниқ параметрлари январ ойи бошида маълум қилинади. Трамп урушни имкони борича тезроқ якунлаш зарурлигини таъкидлаган ва бу масалада Россия томонининг баҳоларини диққат билан тинглаган.
Томонлар вақтинчалик сулҳ урушни чўзишга олиб келиши мумкин, деган масалада ўхшаш позицияда эканини билдирган. Шунингдек, Трамп Путин билан Володимир Зеленский билан учрашувидан олдин маслаҳатлашиш мақсадида боғлангани қайд этилди. Суҳбат якунида АҚШ президенти Зеленский билан учрашувдан кейин яна Путин билан алоқа қилишга келишиб олган.
Россия томони Киев учун Донбасс бўйича қарорни кечиктирмасдан қабул қилиш муҳимлигини билдирган. Ушаковга кўра, Трамп Украинадаги низо у учун энг қийин ташқи сиёсий масала бўлганини тан олган. Путин эса Киевдан ҳарбий ҳаракатларни бутунлай тўхтатиш учун масъулиятли қарор талаб этилишини таъкидлаган.
Суҳбат чоғида Путин Анкорижда эришилган англашувларга таяниш муҳимлигини эслатган. Трамп эса уруш тугаган тақдирда АҚШ ва Россия ўртасида иқтисодий ҳамкорлик учун «жуда катта имкониятлар» очилишини айтган. Мулоқот сўнгида икки раҳбар янги йил муносабати билан бир-бирини табриклаб, Россия ва АҚШ халқларига тинчлик ва фаровонлик тилаган.
