Хонандани ўлдиришга тарғиб қилган видеоролиги блогер учун узр сўради

Тошкент шаҳар ИИББ хонанда Мубинлолони ўлдиришга чақириқ сифатида баҳоланиши мумкин бўлган видеоролик муаллифига нисбатан текширув бошлади. Бу ҳақда пойтахт ички ишлар бошқармаси маълум қилди.

6-ноябрь куни кечқурун Олмазор тумани ИИО ФМБ томонидан қарийб 600 минг обуначига эга бўлган «умр.шам» тахаллусли блогернинг шахси аниқланиб, вазият ИИББ назоратига олинган. Идора томонидан эълон қилинган видеода блогер ўз ҳаракатларидан пушаймонлигини билдирган.

«ИИО ходимлари мен яратган контент, ролик бўйича қонуний чора кўрилишини тушунтиришди. Мен ушбу контентим учун барчадан узр сўрайман. Қилган ишимдан пушаймонман», — дейди блогер.

«Қора қоп» ва зўравонлик тарғиботи

Бир неча кун ичида 1 миллиондан ортиқ маротаба кўрилган ушбу видеода қаҳрамон хонанда Мубинлолонинг клипини томоша қилиб, унинг ижоди «яхшиликка олиб бормайди ва миллий маънавиятга зиддир» деган хулосага келади.

Сўнгра у хонандани ўлдириб, жасадини қора қопга кўмишга очиқдан-очиқ ишора қилувчи ҳаракатларни амалга оширади.

Ролик давомида қаҳрамон жамиятда ўзлиги ва шаънини унутган одамлар кўпайиб кетганини таъкидлаб, унга янада кўпроқ қора қоп келтиришларини сўрайди. Қасос олиш саҳналаридан сўнг эса муаллиф Ўзбекистон ва Ички ишлар вазирлиги байроқларини кўтариб чиқади.

Nemolchi.Uz лойиҳаси 4-ноябр куни ҳуқуқ-тартибот органларини видеоролик мазмунига ва унинг муаллифи хатти-ҳаракатларига ҳуқуқий баҳо беришга чақирган.

Лойиҳа вакиллари бундай контент зўравонлик ва ўзбошимчалик билан жазолаш ғояларини тарғиб қилиши, жамоат хавфсизлиги ҳамда қонун устуворлигига таҳдид туғдиришини таъкидлаган.

«Ҳеч ким мустақил равишда ким яшашга лойиқ ва ким лойиқ эмаслигини ҳал қилиш ҳуқуқига эга эмас», — дейилади лойиҳанинг 6-ноябрдаги баёнотида.

Nemolchi.Uz, шунингдек, ролик эълон қилинганидан кейин бир неча кун давомида муаллифнинг хатти-ҳаракатларига ҳуқуқий баҳо берилгани ҳақида расмий ахборот бўлмаганини танқид қилган. Лойиҳа оддий фуқаролар ижтимоий тармоқлардаги фикрлари учун жавобгарликка тортилаётган бир пайтда, зўравонлик саҳналари акс этган видео муаллифига нисбатан муносабат нега кечикаётганини сўраган.

Ҳозирда мазкур ҳолат юзасидан терговга қадар текширув ўтказилмоқда. ИИББ фуқароларни интернетда ахборот тарқатишда масъулиятли бўлишга ва қонунларга риоя қилишга чақириб, текширув якунларига кўра албатта қонуний қарор қабул қилинишини билдирган.