АҚШ Сенатига илк бор мусулмон киши сайланди

Прогрессив демократ Абдул Ал-Сайид 3 ноябрь куни бўлиб ўтган оралиқ сайловларда Мичиган штатидан АҚШ Сенатига сайланиб, мамлакат тарихидаги илк мусулмон сенаторга айланди. 42 ёшли Ал-Сайид ўзининг асосий рақиби — республикачи Майк Рожерсни мағлубиятга учратди ва 2027 йилнинг январь ойида расман лавозимига киришади.

«Associated Press» (AP) агентлиги маълумотларига кўра, бюллетенларнинг 96 фоизи санаб чиқилгач, Абдул Ал-Сайид 2 миллион 480 мингдан кўпроқ (52,4 фоиз) овоз тўплаган. Собиқ конгрессмен ва ФТБ (ФБР) агенти бўлган Майк Рожерс эса 2 миллион 154 мингдан ортиқ (45,6 фоиз) овоз олди. Учинчи ўринни 1 фоиз овоз билан Либертарлар партияси номзоди Лидия Кристенсен эгаллади.

Собиқ соғлиқни сақлаш мутасаддиси бўлган Абдул Ал-Сайид ўз ғалабасини AP ва йирик телеканаллар расмий натижаларни эълон қилишидан бир соатча олдин нишонлашни бошлади. У Детройтда Мичиган демократлари уюштирган тадбирда саҳнага чиқиб, шундай деди: «Мичиган, биз буни уддаладик».

Ал-Сайид ўз сайловолди ҳаракатини «умид кампанияси» сифатида, рақибининг ҳаракатларини эса «корпорациялар пули билан юритилган реклама кампанияси» сифатида таърифлади.

«Сиз нафратни танладингиз, Мичиган эса умидни танлади», — деди у рақибига қарата ва қўшимча қилди: «Майк, энди нафақангиздан роҳатланинг».

Шунингдек, у ўз нутқида Дональд Трампнинг «Американи яна буюк қиламиз» (MAGA) шиорига ҳам тўхталиб ўтди. Унинг фикрича, Американинг буюклиги ўтмишда эмас, балки ўзини яхшилай олиш қобилиятидадир.

«Бизга яна буюк бўлиш шарт эмас. Бизни доим буюк қилиб келган нарсани — янада мукаммал бўлиш иродасини қабул қилишимиз керак. Ҳозир бу тизимни жуда узоқ вақтдан бери бизга қарши бузиб келган корпорациялар, миллиардерлар ва махсус манфаатдор гуруҳларга қарши чиқиш демакдир», — деди сиёсатчи.

Кампания давомида Абдул Ал-Сайид қатор ирқчилик ва исломофобик ҳужумларга дуч келди. Рақиблари, жумладан, Дональд Трамп ва унинг вице-президенти Жей Ди Вэнс кўпинча номзоднинг исми ва динига урғу берди.

Трамп уни «коммунист» ва «жиҳодчи» деб атади, шунингдек, у Сенатга кириши учун металл детекторидан ўтишига тўғри келишини даъво қилди. Ал-Сайид эса бу айбловларни кескин рад этиб, рақиблари халқни қийнаётган озиқ-овқат ва ёқилғи нархлари ҳақида гапириш ўрнига, жамиятни бўлиб юборишга ҳаракат қилаётганини таъкидлади.

«Улар айримларимиз учун торлик қиладиган Американи хоҳлашади. Биз эса Америка барчамиз учун етарлича кенг эканини биламиз», — деди Ал-Сайид.

Ал-Сайиднинг Яқин Шарқ бўйича қарашлари Демократик партия ичида ҳам турлича фикрларни юзага келтирди. У Исроилнинг Ғазодаги ҳаракатларини «геноцид» деб атайди ва АҚШнинг Исроилга ҳарбий ёрдамини тўхтатиш тарафдори ҳисобланади.

Умуман олганда, сиёсатчи хорижий армияларни молиялаштиришга қарши. Унинг бу талаби нафақат Исроилга, балки Миср, Иордания ва Саудия Арабистонига ҳам тегишли. Ўз нутқида у солиқлар фақат мамлакат ичкарисидаги мактаблар, соғлиқни сақлаш ва инфратузилма учун сарфланиши кераклигини, пуллар «апартеид, геноцид ёки уруш учун юборилишини истамаслигини» таъкидлади.

Исроилни қўллаб-қувватловчи «Aipac» лобби ташкилоти праймериз босқичида Ал-Сайидни тўхтатиб қолиш учун қарийб 30 миллион доллар сарфлаган эди. Умумий ҳисобда эса октябрь ойи ўрталарига қадар ҳар икки партия томонидан ушбу штатдаги сайлов пойгасига 220 миллион доллардан ортиқ маблағ йўналтирилган.