Beeline, Ucell, Mobiuz ва Uztelecom: қайси алоқа оператори энг кўп солиқ тўлайди?

Солиқ қўмитаси 2026 йил I чорагида хизмат кўрсатиш корхоналари томонидан тўланган солиқлар бўйича маълумот берди.

2026 йилнинг январ-март ойларида алоқа операторлари орасида энг йирик солиқ тўловчи — «O‘zbektelekom» АЖ бўлди. Компания ушбу даврда бюджетга 353,4 млрд сўм солиқ тўлади. Ўтган йилнинг шу даврида бу кўрсаткич 236, 5 млрд сўмни ташкил этганди.

«O‘zbektelekom» 2025 йилда ҳам алоқа операторлари ичида энг кўп, жами 1,36 трлн сўм солиқ тўлаганди.

Иккинчи ўринни «Coscom» МЧЖ (Ucell) эгаллади. Компания январ–март ойларида 127,4 млрд сўм солиқ тўлади. Компания ўтган йилнинг биринчи чорагида 79,7 млрд сўм солиқ тўлаганди.

Кейинги поғонада «Unitel» МЧЖ (Beeline) жойлашди. Ушбу оператор биринчи чорак якунларига кўра давлат бюджетига 107,5 млрд сўм солиқ тўлаган. Бироқ бу кўрсаткич 2025 йилнинг биринчи чорагида 125,2 млрд сўмни ташкил этганди.

Рўйхатни 83,4 млрд сўм солиқ тўлаб, «Universal Mobile Systems» МЧЖ (Mobiuz) якунлаб берди. Компания бошқа иштирокчиларга нисбатан камроқ кўрсаткич қайд этган бўлса-да, ўтган йилнинг шу даврига (40,6 млрд) нисбатан икки баробар кўпроқ солиқ тўлади.

Маълумот учун, ҳозирда «Mobiuz» компаниясини хусусийлаштириш жараёнлари кетмоқда. Давлат активларини бошқариш агентлигининг 2025 йил 30 декабрдаги баёнотига кўра, компанияни сотиб олишга давогар бўлган 6 та талабгорнинг мажбуриятга эга таклифлари қабул қилиб олинга ва улардан 3 таси жозибали деб топилган. Жозибали деб топилган таклифлар эгаларига 23 январгача ўз таклифларини яхшилаш учун муҳлат берилган. Шундан сўнг, учта инвесторга ўз таклифларини янада яхшилаш учун 21 апрелгача қўшимча муддат берилганди. Муддат тугади, лекин ҳалигача Давактив расмий баёнот бермади. 

«Mobiuz» ни хусусийлаштириш учун стратегик ва молиявий консультант сифатида «Rothschild & Co», солиқ ва юридик экспертиза учун «KPMG», мустақил баҳоловчи сифатида «Deloitte» компаниялари жалб этилган.