Эпштейн ўз «масжиди»ни Маккадан келтирилган кисва ва Ўзбекистон кошинлари билан безатган — «NYT»

АҚШ Адлия вазирлиги ва Вакиллар палатасининг Назорат қўмитаси томонидан эълон қилинган янги ҳисоботларда Жеффри Эпштейн ўзининг Кариб денгизидаги «Little Saint James» оролида қурган сирли бинога «масжид» сифатида ёндашгани ва уни безаш учун Макка шаҳри ҳамда Ўзбекистондан келтирилган ноёб ашёлардан фойдалангани фош этилди. Бу ҳақда «The New York Times» маълум қилди.

Мазкур ҳужжатлар Эпштейннинг нафақат жиноий фаолияти, балки унинг Яқин Шарқдаги сиёсий ҳамда маданий доираларга кириб боришга бўлган уринишларини ҳам очиб беради. Тергов материалларига кўра, молиячи ўзининг шахсий оролида «масжид» деб атаган бинога дунёнинг турли нуқталаридан ноёб экспонатлар тўплаган.

Хусусан, бино ичига ислом оламининг энг муқаддас зиёратгоҳларидан бири — Маккадаги Каъба деворларини безаб турган, Қуръон оятлари туширилган муқаддас тапестриялар келтирилган. Шунингдек, бино деворлари учун Ўзбекистон масжидларига хос бўлган махсус кошинлар ҳамда Суриянинг Алеппо шаҳридаги XV асрга оид «Ялбуға» ҳаммоми меъморчилиги асосида тайёрланган олтин гумбаз ишлатилган.

Эпштейн билан ишлаган румин рассоми Ион Никола терговчиларга берган интервюсида ушбу лойиҳа тафсилотларини очиқлади. Унинг таъкидлашича, Эпштейн расмий ҳужжатларда бинога «мусиқа хонаси» деб ном берган бўлса-да, шахсий суҳбатларда уни доимий равишда «масжид» деб атаган. Ҳатто у арабча «Аллоҳ» сўзи ёзилган нақшлар ўрнига ўзининг исми ва фамилиясининг бош ҳарфлари — «Ж» ва «Е» белгиларини туширишни буюрган.

Саудия ва БАА билан алоқалари

Ҳужжатларда Эпштейннинг Саудия Арабистони ва Бирлашган Араб Амирликларининг юқори лавозимли шахслари билан алоқалари ҳам алоҳида қайд этилган. Норвегиялик дипломат Терье Род-Ларсен воситачилигида у Саудия Арабистони валиаҳд шаҳзодаси Муҳаммад бин Салмон билан учрашгани айтилмоқда.

Ушбу учрашувлар давомида Эпштейн «Aramco» давлат нефт компаниясини хусусийлаштиришда маслаҳатчи бўлиш ҳамда мусулмон мамлакатлари учун «шариат» деб номланган ягона валюта жорий этиш каби ғояларни илгари сурган.

Маълумотларга кўра, ушбу алоқалар натижасида Саудия томонидан Эпштейн оролидаги «масжид» учун махсус чодир ва Каъбадан олинган учта ноёб тапестрия юборилган. Уларнинг бири Каъбанинг ички қисмида ишлатилган бўлса, иккинчиси унинг ташқи деворларини ёпиб турган муқаддас кисванинг бир қисми бўлган.

Саудиялик вакила Азиза ал-Аҳмадий Эпштейнга ёзган мактубида ушбу қора мато камида 10 миллион мусулмоннинг кўз ёши ва дуоларини ўзида жамлаганини таъкидлаган.

Эпштейннинг ушбу ҳаракатлари унинг атрофидаги бошқа таъсирли шахсларга ҳам салбий таъсир кўрсатган. Хусусан, БААнинг «DP World» компанияси раҳбари Султон Аҳмад бин Сулайем Эпштейн билан биргаликда муқаддас тапестрияни кўздан кечираётгани акс этган сурат эълон қилингач, жорий йил бошида лавозимидан истеъфо бергани айтилмоқда.

Бинонинг тақдири

Мазкур сирли бинонинг тақдири 2017 йилда Кариб денгизида содир бўлган «Мария» тўфонидан сўнг оғирлашган. Табиий офат бинога ва унинг ичидаги баъзи нодир ашёларга жиддий зарар етказган.

саудиялик таниқли журналист Жамол Қошиқчининг ўлдирилиши билан боғлиқ воқеалардан сўнг Эпштейн ва Саудия доиралари ўртасидаги алоқалар совиган. 2019 йилда Эпштейн жинсий жиноятларда айбланиб қамоққа олингач ва ўша ерда вафот этгач, орол эгалиги шахсий трастга ўтган.

Ушбу янги маълумотлар Эпштейннинг ўз таъсир доирасини кенгайтириш мақсадида диний муқаддас ашёлардан қандай фойдаланганини кўрсатувчи муҳим далил сифатида тергов ҳужжатларига киритилган.