Qamchibek Tashiyev davlat to‘ntarishiga urinishda ayblandi

Qirg‘izistonda Milliy xavfsizlik davlat qo‘mitasining sobiq rahbari Qamchibek Tashiyev davlat to‘ntarishiga urinishda ayblandi. U bilan birga yana ikki nafar sobiq yuqori lavozimli amaldor ham ayblanmoqda, deb xabar beradi «24.kg».

Gap Qamchibek Tashiyev, sobiq deputat Qurmankul Zulushev va parlamentning sobiq spikeri Nurlanbek Turgunbek uulu haqida bormoqda. Ularning advokati Sherdor Abdukaparovning ma’lum qilishicha, qo‘yilgan ayblov moddalari bu ish bo‘yicha avval ayblangan boshqa shaxslarga nisbatan qo‘llangan moddalarga o‘xshash. Ularning uchalasi IIV Bosh tergov boshqarmasida so‘roq qilingan, u yerda bir necha soat bo‘lganidan so‘ng binodan chiqib ketgan. Rasmiy idoralar hozircha ish tafsilotlarini oshkor qilmayapti.

«75 maktub»

Manbalarga ko‘ra, tergov «75 maktub» deb atalgan murojaat bilan bog‘liq, unda bir guruh fuqarolar prezident Sadir Japarovga muddatidan oldin saylov o‘tkazishga chaqiriq bilan murojaat qilgan. Ushbu maktub fevral oyida paydo bo‘lganidan keyin mamlakatda kadrlar o‘zgarishlari yuz bergan: qator amaldorlar lavozimidan ozod etilgan, ayrim deputatlar, jumladan, ushbu ish figurantlari ham mandatlarini topshirgan. Keyinchalik jinoyat ishi qo‘zg‘atilgan va imzo chekkanlarning bir qismi hozir hibsxonada saqlanmoqda.

Avvalroq Qirg‘iziston prezidenti Sadыr Japarov intervyusida «75 maktub»ning paydo bo‘lishidan tortib parlamentda muhokama qilinishigacha bo‘lgan jarayonni kuzatib borganini aytgan. Hujjatni plenar majlisga olib chiqish rejalashtirilganda, hokimiyat tezkor ravishda aralashib, choralar ko‘rgan.

Qirg‘izistonda navbatdagi prezident saylovlari 2027-yil yanvar oyida bo‘lib o‘tadi.