O‘zbekiston yarimo‘tkazgichlar sanoatini rivojlantirish bo‘yicha 10 yillik strategiyaga ega bo‘ladi
«Intel» sobiq eksperti va o‘zbekistonlik olimlar ishtirokida mikroelektronika strategiyasi tayyorlanmoqda.
© Maksim Shmeljov / Shutterstock.comO‘zbekistonda 2027–2036 yillarga mo‘ljallangan mikroelektronika va yarimo‘tkazgichlar sanoatini rivojlantirish bo‘yicha milliy strategiya tayyorlanmoqda. Osiyo taraqqiyot banki (OTB) ushbu maqsadlar uchun 1,2 million AQSH dollari miqdorida texnik yordam ajratishni ma’qulladi. Bu haqda Iqtisodiyot va moliya vazirligi xabar berdi.
Mablag‘larning taqsimlanishi va xalqaro tender
Ajratilgan mablag‘ning 1 million dollari bevosita strategiyani ishlab chiqishga, qolgan 200 ming dollari esa konsultantlarni jalb qilish va kadrlar salohiyatini oshirish dasturini ishga tushirishga yo‘naltiriladi.
Hujjatni tayyorlaydigan xalqaro konsalting kompaniyasini tanlash bo‘yicha tender 2026 yil 15-oktabrda yakunlangan. Tanlovda AQSH, Singapur, Malayziya va O‘zbekistondan 5 ta kompaniya ishtirok etgan.
Ishlab chiqish guruhi:
Strategiyani tayyorlashga yarimo‘tkazgichlar sohasida 25 yildan ortiq tajribaga ega xalqaro va mahalliy mutaxassislar jalb qilingan.
Alohida taklif etilgan amerikalik ekspert Glenn Kuiro (Glenn Quiro) 17 yil davomida «Intel» korporatsiyasida faoliyat yuritgan. Mahalliy mutaxassis sifatida 15 yillik tajribaga ega fizika-matematika fanlari doktori (PhD) Oybek Abdulxayev ishtirok etmoqda.
Kadrlar tayyorlash va chet elda malaka oshirish
Kadrlar salohiyatini oshirish dasturi doirasida 300 ta nomzod orasidan 50 kishi saralab olinib, ular uchun integral sxemalarni loyihalash (IC Design) bo‘yicha o‘quv kurslari tashkil etildi:
— Malayziya va Janubiy Koreya: 20 nafar nomzod Malayziyadagi stipendial kurslarga yuboriladi. Yana 20 nafar mutaxassis va o‘qituvchi Janubiy Koreyaning Sunsil va Xoseo universitetlariga ikki oylik malaka oshirishga yuboriladi.
— «ToshTech» va NIELIT loyihasi: Hindistonning NIELIT instituti bilan hamkorlikda «ToshTech» texnik universiteti bazasida 100 kishi uchun VLSI va yarimo‘tkazgich texnologiyalari bo‘yicha bepul o‘quv dasturi yo‘lga qo‘yilmoqda.
— Davlat xizmatchilari ta’limi: 2025–2026 yillar davomida o‘tkazilgan trening va seminarlarda 30 dan ortiq vazirlik va idoralarning 130 ga yaqin rahbar xodimlari yarimo‘tkazgichlar sohasi bo‘yicha o‘z bilimlarini oshirdi.
