Qirg‘izistonda benzin narxi 9 foizga oshdi

Qirg‘izistonda asosiy turdagi yoqilg‘i narxlari Qozog‘iston, Rossiya va Belarusdagidan yuqori ekani ma’lum bo‘ldi. Shu bilan birga, respublikada benzin va dizel Armaniston, Tojikiston hamda O‘zbekistondagiga qaraganda arzonroq. Bu haqdagi ma’lumotlarni 4-avgust holatiga ko‘ra Qirg‘iziston Monopoliyaga qarshi tartibga solish xizmati taqdim etdi.

Qirg‘iziston bo‘yicha taqqoslashda Bishkek shahridagi narxlar asos qilib olingan. Bishkekda AI-92 markali benzinning bir litri 86,9 som (0,99 dollar) turadi. Bu Qozog‘istondagidan 40,1 somga, Rossiyadagidan 8,6 somga va Belarusdagidan 8,4 somga qimmatroq. Shu bilan birga, ushbu markadagi benzin Qirg‘izistonda Armaniston, Tojikiston va O‘zbekistondagiga qaraganda arzonroq.

AI-95 bo‘yicha ham xuddi shunday holat kuzatilmoqda. Bishkekda uning narxi bir litr uchun 109,9 somni (1,26 dollar) tashkil etadi. Taqqoslash uchun, Qozog‘istonda bu ko‘rsatkich 0,69 dollar, Rossiyada 0,98 dollar, Belarusda esa 0,93 dollar. Armaniston, Tojikiston va O‘zbekistonda esa ushbu markadagi benzin bundan qimmatroq.

Bishkekda dizel yoqilg‘isining bir litri 99,9 somdan (1,14 dollar) sotilmoqda. Bu Qozog‘iston, Rossiya va Belarusdagi narxlardan yuqori, biroq Armaniston va Tojikistondagidan past. O‘zbekiston bilan farq esa deyarli yo‘q — bu yerda bir litr dizel 1,14 dollar turadi.

Bishkekda avtogazning bir litri 48,8 somni (0,56 dollar) tashkil etadi. U Qozog‘iston, Rossiya, Belarus va O‘zbekistondagidan qimmatroq, ammo Armaniston va Tojikistondagidan arzonroq.

Narxlar belgilangan maksimal chegaradan yuqori

Oldinroq «Economist.kg» Qirg‘izistonda yoqilg‘i uchun maksimal chakana narxlar joriy etilgani haqida xabar bergandi. Bishkek uchun AI-92 benzini narxining yuqori chegarasi litriga 79,9 som, dizel yoqilg‘isi uchun 93,9 som va avtogaz uchun 45,8 som etib belgilangan.

AI-95 markali benzin esa 7-iyuldan boshlab davlat tomonidan narx jihatidan tartibga solinmaydi. Shu sababli ushbu marka uchun avval belgilangan limit endi amal qilmaydi. Davlat monopoliyaga qarshi xizmati keltirgan narxlar bilan amaldagi limitlar taqqoslanganda:

AI-92 narxi 86,9 som bo‘lib, belgilangan 79,9 somlik limitdan 7 som yoki 8,8 foizga yuqori. Dizel narxi 99,9 som bo‘lib, 93,9 somlik limitdan 6 som yoki 6,4 foizga oshgan. Avtogaz narxi 48,8 somni tashkil etib, 45,8 somlik limitdan 3 som yoki 6,6 foizga yuqori.

Shunday qilib, davlat tomonidan narxi tartibga solinadigan uchala turdagi yoqilg‘i ham Bishkekda belgilangan maksimal narxlardan qimmatroq sotilmoqda.

Eslatib o‘tamiz, avvalroq Qirg‘izistonda benzin va dizel narxi yil boshidan beri qanchaga oshgani haqida yozgan edik.