1 mlrd kWh: O‘zbekistonda «yashil» energiya ishlab chiqarish 40 foizga o‘sdi

2026 yil 13-fevral soat 12:30 holatiga ko‘ra, O‘zbekistondagi quyosh va shamol elektr stansiyalari jami 1 mlrd kWh elektr energiyasi ishlab chiqardi. Energetika vazirligi ma’lumotiga ko‘ra, bu ko‘rsatkich 2025 yilning mos davriga nisbatan 400 mln kWh yoki 40 foizga yuqori.

Hozirgi kunda mamlakatda umumiy quvvati 5582 MW bo‘lgan 15 ta quyosh fotoelektr stansiyasi va 5 ta shamol elektr stansiyasi faoliyat yuritmoqda. Joriy yil boshidan quyosh stansiyalari 396 mln kWh, shamol stansiyalari esa 604 mln kWh energiya ishlab chiqargan.

Energetika vazirligi hisob-kitoblariga ko‘ra, mazkur hajm natijasida 267 mln metr kub tabiiy gaz tejaldi va atmosferaga 575 ming tonnadan ortiq zararli moddalar chiqishining oldi olindi.

O‘sish dinamikasi

So‘nggi yillarda qayta tiklanuvchi energiya manbalari keskin o‘sishni namoyon etmoqda. 2022 yilda Navoiy va Samarqand viloyatlaridagi quyosh stansiyalari 434 mln kWh, 2023 yilda esa 576,9 mln kWh elektr ishlab chiqargan.

2024 yilda 9 ta quyosh va 1 ta shamol stansiyasi 4 mlrd 860 mln kWh energiya ishlab chiqargan bo‘lsa, 2025 yil yakunlariga ko‘ra bu ko‘rsatkich 10,5 mlrd kWhʼga yetdi. Bu «yashil» generatsiya umumiy energiya balansida ulushi ortib borayotganini ko‘rsatadi.

Joriy yil boshidan gidroelektr, quyosh va shamol stansiyalari jami 1 mlrd 570 mln kWh energiya ishlab chiqardi. Bu 400 mln metr kub gaz tejalishi va 863 ming tonna zararli chiqindilar qisqarishiga xizmat qildi.

Energetikadagi burilish

Ishlab chiqarilgan 1 mlrd 570 mln kWh elektr energiyasi o‘rtacha 5 millionta xonadonning 1,5 oylik yoki 625 mingta xonadonning bir yillik iste’moliga teng.

Raqamlar shuni ko‘rsatmoqdaki, qayta tiklanuvchi energiya manbalari nafaqat ekologik, balki iqtisodiy samaradorlik jihatidan ham strategik ahamiyat kasb etmoqda. Endi asosiy masala — ushbu o‘sish sur’atini saqlab qolish va tarmoq infratuzilmasini mos ravishda rivojlantirishdir.