2025 yil birinchi yarmida 13 mingdan ortiq biznes loyiha uchun mablag‘lar ajratilgan

2025 yilning birinchi yarmi yakunlariga ko‘ra, «Tadbirkorlikni rivojlantirish kompaniyasi» AJ orqali 13 mingdan ziyod biznes loyihalarga 1 trln 774 mlrd so‘mlik moliyaviy ko‘mak ko‘rsatildi. Bu haqda kompaniya matbuot xizmati rahbari Abdulla Buvraboyev ma’lum qildi. Oxirgi yetti yil ichida ushbu kompaniya yordamida 64 mingdan ziyod loyihaga jami 19,5 trln so‘mlik yordam ajratilgan. Faqat 2025 yilning birinchi yarmida 13 mingdan ziyod tadbirkor moliyaviy yordam olgan. Moliyaviy ko‘makning katta qismi qishloq xo‘jaligi sohasiga to‘g‘ri keladi — 29 621 loyiha uchun 9,5 trln so‘m. Xizmatlar sohasida 21 802 loyiha (5 trln so‘m), sanoatda esa 12 447 loyiha (4,9 trln so‘m) qo‘llab-quvvatlangan. 33 593 loyiha bo‘yicha kredit foizlarini qoplashga yo‘naltirilgan kompensatsiyalar ajratilgan (6,7 trln so‘m). 13 880 loyiha esa 10,6 trln so‘mlik kafolatlar orqali qo‘llab-quvvatlangan. Qo‘shimcha ravishda 131 ta portfellik kafolat ham berilgan. Prezidentning 2023 yil 10 noyabrdagi PF–193-sonli farmoni asosida «ipoteka xizmatlari» modeli bo‘yicha 41 ta biznes-loyiha 221 mlrd so‘mga moliyalashtirilgan. Shuningdek, mikrokreditlarni qayta moliyalash orqali 16 151 loyihaga 1,5 trln so‘m ajratilgan. Shu jumladan, 9 553 ta ayollar loyihalariga 1,9 trln so‘m, 8 mingdan ortiq «yashil» va energiya tejovchi loyihalarga 2,1 trln so‘m, iqtisodiy jihatdan qiyin tumanlarda 13 603 loyihaga 3,7 trln so‘mlik yordam berilgan. Jami 400 mingga yaqin yangi ish o‘rinlari yaratilgan.