Afg‘onistonga Hayit sovg‘asi, O‘zbekistondan bosh olib ketayotganlar va terminallardan tushgan 48 trillionlik tushum— 25-may dayjesti

O‘zbekiston Qurbon hayiti arafasida Afg‘onistonga insonparvarlik yordami yubordi

O‘zbekiston Qurbon hayiti arafasida Afg‘onistonga insonparvarlik yordami yubordi. 25-may kuni 200 tonnaga yaqin oziq-ovqat mahsulotlari Balx viloyatiga yetkazildi. Yuk tarkibiga un, guruch, shakar, makaron, qandolat, o‘simlik yog‘i va tez tayyorlanadigan oziq-ovqatlar kirgan. Yordam O‘zbekiston prezidenti Shavkat Mirziyoyev topshirig‘i bilan amalga oshirildi va «Astras» kompaniyasi hududidagi marosimda ikki mamlakat rasmiylari ishtirok etdi.

So‘nggi yillarda O‘zbekiston Afg‘onistonga insonparvarlik va ijtimoiy qo‘llab-quvvatlash tashabbuslarini muntazam davom ettirib kelmoqda. Bu hamkorlik qo‘shni davlat aholisi uchun oziq-ovqat, tibbiy va boshqa zarur yordamlarni qamrab oladi. Eslatib o‘tamiz, avvalroq mamlakat Eronga ham farmatsevtika va tibbiy buyumlardan iborat ikkinchi gumanitar karvon yuborgan edi.

O‘zbekistonda bank kartalari soni ilk marta 70 mln donadan oshdi

O‘zbekistonda muomaladagi bank kartalari soni aprel oyida ilk bor 70 milliondan oshib, 72,7 milliontaga yetdi. Oy davomida kartalar soni qariyb 3 milliontaga yoki 4,3 foizga ko‘paygan. O‘sishga asosan Tenge bank, TBC bank, Xalq banki, Hamkorbank va Uzum Bank hissa qo‘shgan, ayrim banklarda esa kartalar soni qisqargan.

Aprelda to‘lov terminallari soni qariyb 444 mingtaga, bankomatlar esa 45,5 mingtaga yetdi. Shu bilan birga, terminallar orqali tushumlar keskin oshib, 48,4 trln so‘mni tashkil qildi. Mutaxassislar bu o‘sishni 1-apreldan naqdsiz to‘lovlar tizimi joriy etilgani bilan ham bog‘lamoqda.

Aprel oyida O‘zbekistonda ishbilarmonlik faolligi 6,5 foizga o‘sdi

O‘zbekistonda 2026 yil aprel oyida ishbilarmonlik faolligi indeksi 1065 birlikka yetdi. Bu ko‘rsatkich mart oyiga nisbatan 6,5 foizga, o‘tgan yilning shu davriga nisbatan esa 22 foizga oshgan. Mutaxassislarga ko‘ra, o‘sishga bank operatsiyalari, birja savdolari va tovar belgilari ro‘yxatdan o‘tkazilishi asosiy turtki bergan.

Aprel oyida bank hisob raqamlari operatsiyalari 8,3 foizga, tovar-xom ashyo birjasidagi xaridlar 5,4 foizga oshgan. Faol xo‘jalik subyektlari soni 514,7 mingtaga yetgan, tovar belgilari ro‘yxatdan o‘tkazilishi esa 33,9 foizga ko‘paygan. Hududlar kesimida eng yuqori o‘sish Qoraqalpog‘iston, Namangan, Jizzax va Sirdaryoda qayd etilgan.

Xorijga ko‘chib ketayotgan o‘zbekistonliklar soni kamaymoqda

2026 yilning yanvar–mart oylarida O‘zbekistondan doimiy yashash maqsadida xorijga ko‘chib ketganlar soni 2 277 nafarni tashkil qildi. Bu o‘tgan yilning shu davriga nisbatan 4,1 foizga kam bo‘lib, ko‘chib ketish ko‘rsatkichi pasayganini ko‘rsatadi.

Ko‘chib ketganlarning asosiy qismi Qozog‘iston (80,6 foiz) va Rossiyani (16,4 foiz) tanlagan. Hududlar bo‘yicha eng yuqori ko‘rsatkich Qoraqalpog‘istonda, keyingi o‘rinlarda Toshkent viloyati va Navoiy viloyati qayd etilgan bo‘lsa, eng past ko‘rsatkichlar Surxondaryo, Qashqadaryo va Farg‘ona viloyatlarida kuzatilgan.